ESTAFET/ Amerika və Kanada birləşmiş liqası olan Milli Basketbol Assosiasiyasının (NBA) final seriyası bu gün keçirilən ilk qarşılaşma ilə başladı. "Qolden Steyt Uorriorz" komandası evində "Klivlend Kavalyerz"i qəbul edib.

Əksər mütəxəssislərin və basketbol həvəskarlarının gözlədiyi kimi, görüş Qolden Steytin qələbəsi ilə yekunlaşıb - 113:91. Lakin heç kim Klivlenddən 22 xallıq məğlubiyyət gözləmirdi. İlk hissə gərgin mübarizə şəraitində keçdi və 8 xallıq fərqlə Uorriorzun xeyrinə başa çatdı - 35:30, 25:22. Fasilədən sonra Kavalyerzin oyunun gedişini dəyişəcəyi gözlənildiyi halda əksi baş verdi və 3-cü periodu Uorriorz 33:20 öz xeyrinə bitirdi. Son period isə nisbətən sönük keçdi - 20:19. Beləliklə Qolden Steyt Uorriorz çempionluq üçün ilk addııni atdı.  

Görüşün ən məhsuldar oyunçusu Qolden Steytin forvardı Kevin Durant olub - 38 xal, 8 ribaund və 8 ötürmə. Komanda yoldaşı Stiven Kerri aktivinə 28 xal, 6 rubaund və 10 ötürmə yaza bilib. Qonaqların heyətində isə Lebron Ceyms 28 xal, 15 ribaund və 8 ötürmə ilə yadda qalıb. Kayri İrvinq 21 xal, Kevin Lav isə 21 ribaund və 15 xal toplamağı bacarıb.

Seriyada ikinci görüş iyunun 4-də yenə Qolden Steytin arenasında keçiriləcək.