ESTAFET/ 22-23 oktyabr tarixlərində Birləşmiş Ərəb Əmirliyinin (BƏƏ) paytaxtı Əbu-Dabi şəhərində bədii gimnastika üzrə 5-ci beynəlxalq yarış keçirilib.

Almaniya, Rusiya, Qazaxstan, Hindistan, Litva, BƏƏ və Sinqapurla yanaşı Azərbaycanı da bu yarışda 35-ə yaxın gimnast təmsil edib. Onlardan 21-i “Sports box” idman klubunun yetirmələri olub. 2010-2016-cı il təvəllüdlü gimnastlardan ibarət komandamız yarışda dəfələrlə üçrəngli bayrağımızı zirvələrə qaldırıb. 

Beynəlxalq dərəcəli məşqçilər Sevil Fərəcova, Kamilla Kazimova və məşqçilər Sona Rəhmanova, İlahə Məmmədovanın müşayiəti ilə 21 gimnastla təmsil olunan “Sports Box” klubu vətənə 11 qızıl, 8 gümüş, 7 bürünc medalla qayıdıb. 

Gimnastlar arasında kiçik yaşlarından vətənimizi çoxsaylı beynəlxalq yarışlarda uğurla təmsil edən Mina Abbasova da olub. Gimnastımız 3 dəfə fəxri kürsüdə yer alıb. Topla hərəkətlərdə gümüş, gürzlə hərəkətlərdə bürünc medal qazanaraq çoxnövçülükdə 2010-cu il təvəllüdlü gimnastlar arasında bürünc medala sahib olub. 

Balaca gimnastlarımıza və onların məşqçilərinə gələcək yarışlarda uğurlar arzu edirik.