ESTAFET/ Fransada təhsil alan Azərbaycanlı tələbələr Mənsurə Məhərrəmova və Sevinc Musayeva Paris 2024 XVII Yay Paralimpiya Oyunlarının Təşkilat Komitəsi tərəfindən  Azərbaycan milli komandasının könüllüləri olaraq qeydiyyata alınıblar və bu haqda onlara rəsmi bildiriş göndərilib. Könüllülər milli komandaya atletlər kəndi və idman arenalarında dəstək olacaqlar.

Mənsurə Məhərrəmova 2001-ci ildə Bakı şəhərində anadan olub. Azərbaycan Dillər Universitinin Fransız dili müəllimliyi ixtisası üzrə məzunudur. Təhsilini hal-hazırda Fransanın Ruan Universitetində davam etdirir. Tələbəlik illərindən etibarən 50-dən çox yerli və beynəlxalq əhəmiyyətli layihələrdə, tədbirlərdə, idman yarışlarında iştirakçı, könüllü, təşkilatçı kimi təmsil olunub. İş fəaliyyəti olaraq Azərbaycan Respublikası Təhsil Nazirliyinin “Bir” Tələbə-Könüllü proqramının PR mütəxəssisi, daha sonra isə “Vətəndaş Cəmiyyətində Debat” İctimai Birliyinin İctimaiyyətlə Əlaqələr üzrə meneceri kimi fəaliyyət göstərib. Ana dili olan Azərbaycan dilindən əlavə ingilis, rus, fransız və türk dillərini bilir.

Sevinc Musayeva 1999-cu ildə Göyçay rayonunda anadan olub. Azərbaycan Dillər Universitinin Fransız dili müəllimliyi ixtisası, magistr təhsili üzrə isə Fransız dili tərcüməçiliyi ixtisası məzunudur. Təhsilini hal-hazırda Fransanın Ruan Universitetində davam etdirir. Tələbəlik illərindən etibarən yerli və beynəlxalq əhəmiyyətli layihələrdə, universitet daxili tədbirlərdə fəal iştirak edib. Ana dili olan Azərbaycan dilindən əlavə ingilis, rus, fransız və türk dillərini bilir.

Qeyd edək ki, 28 avqust – 08 sentyabr 2024-cü il tarixlərində Fransanın paytaxtı Paris şəhərində XVII Yay Paralimpiya Oyunları keçiriləcək. Oyunlara Azərbaycan komandasının böyük heyətlə qatılacağı gözlənilir. Beləki Tokio 2020 Yay Paralimpiya Oyunlarında 14 qızıl, 1 gümüş və 4 bürünc medal olmaqla ümumilikdə 19 medal qazanmış Azərbaycan komandası Parisdə də yüksək nəticə əldə etməyə iddialıdır. Azərbaycan nümayəndə heyətinin Parisə 2024-cü ilin avqustunda yola düşməsi nəzərdə tutulub. İdmançıların son hazırlıq mərhələsi 2024-cü ilin avqust ayında Fransanın Ajan şəhərində keçirilməsi planlaşdırılıb.

Azərbaycan Milli Paralimpiya Komitəsi ölkəmizdə inkişaf etmiş könüllülük hərakatının üzvləri ilə daima sıx əlaqədə olur. Könüllülərimiz bir çox yerli və beynəlxalq yarışların yüksək səviyyədə keçirilməsində Komitəyə dəstək göstəriblər.