ESTAFET/ Klublarımızın Avropa Liqasının 2-ci Təsnifat mərhələsindəki oyunlarının keçirilmə vaxtı müəyyənləşib.

UEFA klublarımızın oyunlarının təqvimində bəzi dəyişiklik edib. Belə ki, Avropa Liqasındakı hər 3 təmsilçimiz (“Qəbələ”, “Zirə” və “İnter”) 2-ci təsnifat mərhələsində ilk oyununu evdə keçirməli idi. Lakin qitənin ali futbol qurumu “Zirə”yə ilk oyununu səfərdə keçirməyə icazə verib. Klubumuz Lüksemburqdakı cavab qarşılaşmasından sonra bərpa məşqi keçib “Astra” ilə ilk oyun üçün birbaşa Rumıniyaya yollanacaq.

“Qəbələ”nin oyunuyla bağlı heç bir dəyişiklik edilməyib. Qəbələlilər əvvəl nəzərdə tutulduğu kimi, Polşa “Yagelloniya”sını iyulun 13-də, 8-ci km qəsəbə stadionunda qəbul edəcək.

“İnter” 2-ci mərhələdəki rəqibi “Fola”yla “Dalğa Arena”da qarşılaşacaq. Ancaq “Qəbələ”nin matçı ilə üst-üstə düşməməsi üçün bu oyun iyulun 13-də yox, bir gün əvvəl reallaşacaq.

“İnter”lə “Qəbələ” iyulun 20-də cavab matçını səfərdə, “Zirə” isə həmin gün evdə keçirəcək.