Bu gün Binə Atçılıq Mərkəzində atçılıq idmanının ən populyar növü olan çövkən üzrə ilk dünya çempionatına start verilib. Turnirin açılış oyunu Azərbaycan və Qazaxıstan komandaları arasında keçirilib. Matç Azərbaycan millisinin 5:0 hesablı qələbəsi ilə başa çatıb. Komandamızın kapitanı Elçin Camallı görüşdə dubla imza atıb.

Bu gün eyni məkanda daha üç oyun keçirilib və nəticələr aşağıdakı kimi olub:

• Mərakeş - Küveyt: 5:0
• Nigeriya - Almaniya: 5:0
• Türkiyə - Malta: 5:1

Mundial iştirakçıları iki qrupda mübarizəyə başlayıblar:

• A qrupu: Azərbaycan, Qazaxıstan, Türkiyə, Malta, Özbəkistan
• B qrupu: Mərakeş, Küveyt, Nigeriya, Almaniya, Polşa

Çempionat iyunun 16-da üçüncü yer uğrunda oyun və final matçı ilə yekun vurulacaq.

Qaydalar:

• Qalibiyyətə görə komandaya 3, heç-heçəyə görə 1 xal verilir.
• Oyunlar hər biri 15 dəqiqə olmaqla iki hissədən ibarətdir.
• Hissələr arasında 10 dəqiqə fasilə olur.
• Komandaların meydana çıxan heyəti 4 nəfərdən ibarətdir (iki hücumçu, bir yarımmüdafiəçi və bir müdafiəçi).