ESTAFET/ Xəbər verdiyimiz kimi, Bolqarıstan Albena şəhərində yeniyetmə boksçular arasında Avropa birinciliyi davam edir. Yığmamız qitə birinciliyinə tam heyətlə qoşulmuşdu. Bu gün qitə birinciliyində ikinci döyüş günü idi və daha 5 boksçumuz mübarizəyə qoşulmuşdu.

48 kq çəki dərəcəsində Rüfət Fətullayevlə 75 kq-da döyüşən Murad Allahverdiyev çətin də olsa, ilk görüşlərini qələbə ilə başa vurmağı bacarıblar. Belə ki, Rüfət ingilis Cüneyd Bostanı, Murad isə moldovan Pavel Platonu minimal hesabla - 3:2 məğlub ediblər. 

Digər boksçularımız Fərid İsmayıllı (60 kq, Cahid Qurbanov (70 kq) və Vüqar Səmədov (+80 kq) müvafiq olaraq, rus Sino Sobirov, erməni Qaqik Vardanyan və ingilis Uilyam Hou ilə döyüşdən məğlub ayrılaraq mübarizəni dayandırıblar.

Xatırladaq ki, ilk gün 4 boksçumuz mübarizəni dayandırmışdı. Bununla da, qitə birinciliyində medal şansı olan 5 boksçumuz qaldı.