ESTAFET/ Xəbər verdiyimiz kimi, bu günlərdə Antalyada (Türkiyə) şahmat üzrə klublararası Avropa çempionatı keçirilmişdi. Azərbaycanın həm kişilər, həm də qadınlardan ibarət "Odlar Yurdu" komandaları uğurlu çıxışlarının yekununda, ölkəmizə gümüş (qadınlar) və bürünc (kişilər) medalları qazandırmışdılar. 

Zəka sahiblərimiz üçün növbəti yarış meydanı Yunanıstan olacaq. Belə ki, oktyabrın 28-dən noyabrın 6-dək burada şahmat üzrə komandalararası Avropa çempionatı keçiriləcək və hər iki yığmamız qitə çempionatında təmsil olunacaq. 

Millimizin heyəti də artıq müəyyənləşib. Həm kişi, həm də qadın yığmamız çempionatda əsas heyətlə mübarizə aparacaq.

Kişilər: Şəhriyar Məmmədyarov, Teymur Rəcəbov, Arkadiy Naydiç, Rauf Məmmədov və Qədir Hüseynov.

Qadınlar: Günay Məmmədzadə, Gülnar Məmmədova, Ülviyyə Fətəliyeva, Xanım Balacayeva və Zeynəb Məmmədyarova.