ESTAFET/ Xəbər verdiyimiz kimi, Formula 1 komandası "Red Bull"un məşhur avstraliyalı pilotu, bu ilki Azərbaycan Qran Prisinin qalibi Daniel Rikkardo paytaxtımızda səfərdədir. Səfər çərçivəsində bir sıra görüş və tədbirlər planlayan Rikkardo sürpriz bir ziyarət gerçəkləşdirib.

Belə ki, qalibi olduğu trekin gəzintisindən sonra Rikkardo Çempionlar Liqasında mübarizə aparan ilk Azərbaycan komandası olan "Qarabağ" Futbol Klubunun məşq bazasında olub və klub üzvləri ilə görüşüb. 

Ünlü pilotun ziyarəti zamanı komanda gələn həftə İtaliyanın "Roma" komandası ilə keçirəcəyi növbəti görüşə hazırlıqlarını davam etdirirdi. Rikkardo komandanın təlim-məşq keçirdiyi meydana çıxaraq öz futbol bacarığını nümayiş etdirib. Klub tərəfindən ona adı yazılmış futbol geyimi hədiyyə edilib. Rikkardo isə öz tərəfindən ona məxsus ayaqqabını imzalayaraq, baş məşqçi Qurbanova hədiyyə edib.