ESTAFET/ Xəbər verdiyimiz kimi, çox sayda mükafata layiq görülmüş və milyonlarla albom satışı ilə böyük uğur qazanmış britaniyalı müğənni Sem Smit 2019 Formula 1 Azərbaycan Qran Prisinin keçiriləcəyi yarış həftəsonu konsert verəcək.  “Qremmi” və “Oskar” mükafatlı pop ulduzu şənbə günü, 27 aprel tarixində Bakı Kristal Zalında canlı konsert proqramı ilə çıxış edəcək

BŞH-nin icraçı direktoru Arif Rəhimov Sem Smitin Bakıya gəlişinə belə münasibət bildirib:

“2019 Formula 1 Azərbaycan Qran Prisinin keçiriləcəyi yarış həftəsonunun şənbə günü axşam saatlarında canlı konsert proqramı ilə çıxış edəcək Sem Smiti Bakıda qarşılayacağımız üçün çox şadıq. Özünəməxsus səsə malik bu musiqiçi yaradıcılığının ilk günlərindən etibarən dünyanın hər tərəfində özünə böyük dinləyici kütləsi cəlb edib. Əminəm ki, Azərbaycanda da sadiq dinləyiciləri olan Sem Smitin sıralanma turundan sonra baş tutacaq konserti yarış həftəsonumuzun unudulmaz anlarından birinə çevriləcək. Buna görə də, bütün avtoidman azarkeşlərini və musiqisevərləri biletləri indidən əldə etməyə və 26-28 aprel tarixlərində pilotların gərgin mübarizəsi fonunda baş tutacaq əyləncəli yarış həftəsonuna qoşulmağa çağırıram!”