ESTAFET/ İspaniyanın Fuengirola şəhərində yeniyetmələr arasında Avropa kubokuna yekun vurulub. Yarışın sonuncu günü də Azərbaycan milli komandası üçün uğurlu olub. Belə ki, cüdoçularımız 1 qızıl və 1 gümüş medal qazanıblar.

+90 kq çəki dərəcəsində mübarizə aparan Məhəmməd Abdullayev bütün rəqiblərinə qalib gələrək qızıl medal qazanıb.

90 kq çəki dərəcəsində ölkəmizi təmsil edən Adil Kərimli yalnız final görüşündə qələbəni əldən verib və gümüş medala layiq görülüb.

73 kq çəki dərəcəsində çıxış edən Vüsal Şamilov isə 7-ci olub.

Yarışın ilk günündə isə yeniyetmə cüdoçularımız daha uğurlu çıxış edərək, 5 medal qazanmışdılar. Belə ki, Ayxan Tanrıverdiyev (55 kq), Vüsal İbrahimov (60 kq) və Vüsalə Kərimova (40 kq) bütün rəqiblərindən üstün olaraq turnirin qızıl, Knyaz Mahmudlu (66 kq) gümüş, Nazir Talıbov isə Avropa kubokunun bürünc medallarına yiyələniblər.

Bununla da, 4 qızıl, 2 gümüş və 1 bürüc medal qazanaraq Azərbaycan millisi komanda hesabında Avropa kubokunda birinci olub.

Qeyd edək ki, 21 ölkədən 423 idmançının (234 oğlan, 189 qız) mübarizə apardığı mötəbər turnirdə Azərbaycan milli komandası 16 cüdoçu (12 oğlan, 4 qız) ilə təmsil olunurdu.