ESTAFET/ Basketbolun 3x3 növü üzrə kişi və qadınlardan ibarət Azərbaycan millisinin IV İslam Həmrəyliyi Oyunları üçün heyəti açıqlanıb.

Kişilərdən ibarət yığmanın baş məşqçisi Samit Nuruzadə Bakıda keçiriləcək yarışda Amil Həmzəyev, Zaur Paşayev, David Barbakadze və Marşall Mozesə şans verəcək. “Bakı-2017”də “A” qrupunda mübarizə aparacaq kişilərdən ibarət millimiz Türkiyə, Türkmənistan, Səudiyyə Ərəbistanı və Pakistan basketbolçuları ilə qarşılaşacaq.

Qadınlardan ibarət Azərbaycan millisində isə baş məşqçi Tatyana Slojenitsinanın rəhbərliyi ilə Dina Ulyanova, Tatyana Deniskina, Abigail Mollenhauer və Marsedes Uolker iştirak edəcəklər. “A” qrupunda mübarizə aparacaq qadınlardan ibarət millimiz Türkmənistan, Əlcəzair, Mali və Əfqanıstan basketbolçuları ilə qarşılaşacaq.

Ümumilikdə 20 komanda bu idman növü üzrə yarışlara qatılacaq. Bunlardan onu qadınlar və onu kişilərdən ibarət komandadır. Basketball 3x3 ənənəvi basketbol meyançasının yarı hissəsində oynanılır. Hər bir komanda 3 nəfərdən ibarətdir. Bu oyun əsasən “küçə meydanlarında” oynanılır.