Qılıncoynatmanın sablya növü üzrə Rumıniyanın paytaxtı Buxarest şəhərində keçirilən yeniyetmələr arasnda “Riposta Cup” turnirinə yekun vurulub.

Zərifə Hüseynova yeniyetmə qız sablyaçıların şəxsi yarışında yekun sıralamada 6-cı olub.

Qrup mərhələsini mütləq nəticə (6 qələbə) ilə bitirən Zərifə qələbə seriyasının davamını pley-offda da gətirib. Yeniyetmə sablyaçımız yarımfinala gedən yolda rumın, fransız, macar və amerikalı rəqiblərinə qalib gəlib. Zərifə bürünc medalın bir addımlığında Macarıstan idmançısı Nadin Totza 9:15 hesabı ilə uduzub.

Digər təmsilçilərimizdən qrupda 4 qələbəsi olan Valentina Zeynalova 32-liyə yüksəlmək uğrunda keçirilən görüşdə Bolqarıstan qılıncoynadanı Mariela Georgievaya 9:15 hesabı ilə məğlub olub. Fərəh Abbasova və Alla Həsənova qrup mərhələsini adlasa da, pley-offda mübarizəni dayandırıb. Fidan Quliyeva pley-offa adlaya bilməyib.

Yeniyetmə qız sablyaçılarımız komanda yarışında ilk görüşündə İspaniyanın ikinci komandasına 45:16 hesabı ilə qalib gəlsə də, növbəti mərhələdə ABŞ yığmasına 37:45 hesabı ilə uduzub.

Oğlan sablyaçıların şəxsi yarışında Nahid Məmmədli, Timur Husnaddinov və Rəsul Əliyev qrup mərhələsini adlayıb pley-offda mübarizə aparmaq hüququ qazansa da, 64-lüyə yüksələ bilməyib.

Yeniyetmə oğlan sablyaçılarımız komanda yarışında Yunanıstanın 3-cü komandasına 41:45 hesabı ilə məğlub olub.