2023-cü ilin ilk konkur yarışları keçirilib
![](https://estafet.az/uploads/news/2023-04/_estafetaz_013cdd35a0123bb6959f6e2be_o.jpg)
14-15 aprel tarixlərdə Abşeron rayonu, Novxanı kəndində yerləşən “Sərhədçi” Atçılıq Mərkəzinin açıq manejində 2023-cü ilin ilk konkur yarışları keçirilib.
“E”, “L” və “M**” kateqoriyaları üzrə təşkil olunan “Sərhədçi” kuboku turnirində Azərbaycanın müxtəlif atçılıq klublarının yeniyetmə və yetkin yaş qrupları üzrə idmançıları iştirak edib.
İlk yarış 14 aprel tarixdə saat 12:00-da başlamışdır. “E” kateqoriyası üzrə 80 sm hündürlükdə qurulan maneələrdən ibarət yarışda 20 yaşadək idmançılar yaş məhdudiyyəti qoyulmayan atlarla, 20 yaşdan yuxarı idmançılar isə 6 yaşadək olan atlarla iştirak ediblər.
20 idmançının iştirak etdiyi mübarizədə “Məktəb” atçılıq klubunun idmançısı Nicat Rəhimov “Şaxzadə” ləqəbli atla 1-ci, “Elit” atçılıq klubunun idmançısı Aydan Ağayeva “Damla” ləqəbli atla 2-ci, “Gilan” atçılıq klubunun idmançısı Rahib İsmayılov “Aleks 1” ləqəbli atla 3-cü, “Respublika Atçılıq və Müasir Beşnövçülük üzrə İxtisaslaşdırılmış Olimpiya Ehtiyatları Uşaq-Gənclər İdman Məktəbi”nin atçılıq klubunun idmançısı Murad Əlizadə “Light Limerick” ləqəbli atla 4-cü, “Sərhədçi” atçılıq klubunun idmançısı Gülay Fərzəliyeva isə “Cera 59” ləqəbli atla 5-ci yerin sahibi olub.
Saat 14:00-da “L” kateqoriyası üzrə hündürlüyü 120 sm olan yarışda 12 idmançı iştirak etmişdir. Nəticədə “Buta Golden” klubunun idmançısı Eqor Morotski “Astrello” ləqəbli atla 1-ci, “Sərhədçi” atçılıq klubunun idmançısı Ramil İbrahimov “Alart-S” ləqəbli atla 2-ci yerin sahibi olmuş, “Buta Golden” klubunun idmançısı Ekaterina Malaxova isə “Fine Chocolate” ləqəbli atla 3-cü yerə layiq görülüb.
15 aprel tarixində saat 14:00-da “M**” kateqoriyalı 125-130 sm hündürlükdə yerləşdirilmiş maneələrdən ibarət turnirin son yarışında 8 at iştirak edib.
“Buta Golden” atçılıq klubunun idmançısı Eqor Morotski “Astrello” ləqəbli atla öz rəqiblərinə qalib gələrək 1-ci yerin və “Sərhəçi” kubokunun sahibi olmuşdur. “Gilan” atçılıq klubunun idmançısı Rahib İsmayılov “Carthanio” ləqəbli atla 2-ci, “Elit” atçılıq klubunun idmançısı Aydan Ağayeva isə “Zirvə” ləqəbli atla 3-cü yerə layiq görülüb.
Sonda yarış qaliblərin mükafatlandırılması mərasimi ilə başa çatıb.
![](https://estafet.az/img/foto200x133.png)