ESTAFET/ Futbol üzrə Azərbaycan Kuboku yarışında bu gün keçirilən son iki cavab qarşılaşmalarının yekununda yarımfinalçılar müəyyənləşib.

Günün ilk matçında "Səbail"i "Bayıl Arena"da 4:2 hesabı ilə məğlub edən "Qəbələ" yarımfinalda "Neftçi"yə rəqib olub. Xatırladaq ki, Qəbələdə keçirilən ilk oyunda minimal (1:0) hesablı qələbə qazanan "qırmızı-qaralar" 2 oyunun cəminə görə 5:2 hesabı ilə üstün olub. "Neftçi" isə səfərdə 0:1 hesabı ilə məğlub olduğu "Zirə"ni cavab qarşılaşmasında 2:0 hesablı məğlubiyyətə uğtarmışdı. 

Mərhələnin ikinci görüşü Sumqayıtda baş tutub. "Azərsun Arena"da 2:1 hesabı ilə qalib gələn "Qarabağ" titulunu qorumaq üçün bu üstünlükdən yararlana bilməyib. Əvvəldən oyununu düzgün quran "Sumqayıt" yekunda 2:0 hesablı qələbə sayəsində ilk dəfə Azərbaycan Kubokunun yarımfinala adlayıb. Yarımfinalda "kimyaçılar"ın rəqibi hər iki görüşdə "Kəpəz"i məğlub edən (2:0, 3:2) "Keşlə" olacaq. 

Azərbaycan Kubokunda yarımfinal oyunları 2018-ci ilin 11-18 aprel tarixlərində baş tutacaq.