ESTAFET/ Formula 1 iştirakçısı olan "Mercedes" komandası bayramlardan sonra işə başlayıb. İlk işləri isə, azarkeşlərinə maraqlı müsabiqədə iştirak etmək təklifidi. 

Belə ki, hər kəs özünü dizayner kimi sınaya və komandanın fin pilotu Valtteri Bottasın şleminin rənglənməsi üçün öz variantını təklif edə bilər. Sonra Bottas özü daha çox bəyəndiyi variantı seçərək, 2018-ci il Dünya çempionatı zamanı bu şelmdən istifadə edəcək. Qalibi Bottasın imzası ilə bu şlemin oxşarı olan hədiyyə də gözləyir.   

Komandanın rəsmi saytında bu yaradıcı müsabiqədə iştirak etmənin şərtləri haqda məlumat da yerləşdirilib. Bunlar arasında 2 əsas şərt var: mütləq "Mercedes" komandasının rəsmi fan-klubunun üzvü olmaq lazımdı və nümunələr 12 yanvar saat 17:00-adək (Qrinviç vaxtı ilə) göndərilməlidir.  

Valtteri Bottas azarkeşlərinə videomüraciət də ünvanlayıb: "Hər kəsə salamlar. Yeni ilin və Formula 1-in gəlişini qeyd etmək üçün sizə xüsusi sürpriz hazırlamışam. Sizin, 2018-ci ilin əksər yürüşlərində istifadə edəcəyim şlemin dizaynını hazırlamaq şansınız var. Bu haqda elan etməyə çox şadam. İstənilən ideyanızı təklif edin və ola bilər ki, məhz sizin varintı seçəcəm. "Mercedes" komandasının saytında qeydiyyatdan keçərək, müsabiqədə iştirak etsəniz bəxtiniz gətirə bilər. Qalibi mən özüm seçəcəm. Yəqin ki, testlərin başlamasınadək bu baş verəcək. Hər kəsə uğurlar, dizaynlarınızı gözləyirəm".