ESTAFET/ Devid Şumaxer bu ildən etibarən Formula 4 yarışlarında çıxış edəcək. 7 qat Dünya çempionu Mixael Şumaxerin qardaşı Ralf Şumaxerin oğlu daha öncə kartinq yarışlarında iştirak edirdi. Ötən həftəsonu Formula 4 üzrə Əbu-Dabidə təşkil olunan yarışlarda debüt edən Devid artıq Avropa mətbuatında "Şumi-4" təxəllüsü ilə təqdim edilir. 

Debütünə gəlincə isə, Yas-Marina trasında baş tutan yürüşlərdə Devid heç də pis təsir bağışlamayıb. Öncə poul qazanan kiçik Şumaxer daha sonra bütün 4 yürüşdə fəxri kürsüyə qalxa bilib - 3 dəfə 2-ci, 1 dəfə isə 3-cü olub.  

"İlk həftəsonu yürüşləri çox gözəl keçdi" - deyə Devid öz İnstagram səhifəsində paylaşım edib. 

F4 UAE Seriyasının bu mərhələsində Deviddən çox xalı yalnız şəxsi birinciliyin lideri olan belçikalı Şarl Verts toplayıb. Devid hazırda 5-ci pillədə qərarlaşıb. Xatırladaq ki, o yeniyetmələrin çempionatında ilk mərhələdə iştirak etməyib. F4 UAE-nin növbəti mərhələsi gələn həftə davam edəcək. 

16 yaşlı Devid Şumaxer atasının sahibi olduğu US Racing komandasının heyətində çıxış edir.