Portuqaliyanın Elvas şəhərində aerobika gimnastikası üzrə Avropa Çempionatı sona çatdı.

Estafet.az saytının Azərbaycan Gimnastika Federasiyasından aldığı məlumata görə, ölkəmizdə inkişafı 2013-cü ildən başlamış bu idman növü üzrə qitə çempionatında Azərbaycan ilk dəfə təmsil olundu.

Başlanğıc olaraq, Vladimir Dolmatov kişilərin fərdi yarışlarında çıxış etdi. O, 20.150 xalla 20 iştirakçı arasında 13-ü yeri tutdu.

Daha sonra isə yarışlara Aynur Cabbarlı, Vladimir Dolmatov, Vera Bosıx, Elçin Məmmədov və Timur Ələkbərovdan ibarət qrup qatıldı. Komanda finala vəsiqə qazandı və nəticədə 6-cı yerdə qərarlaşdı. Hakimlər təmsilçilərimizin çıxışlarını 19,269 xalla qiymətləndirdilər.

Nəzərinizə çatdırmaq istərdik ki, təmsilçilərimiz Bakıda 1-ci Avropa Oyunları çərçivəsində keçirilən aerobika üzrə yarışlarda qrup təsnifat mərhələsində 17.383 xalla 10-cu yeri tutmuşdular.