ESTAFET/ Bakı 2017 İslam Həmrəyliyi Oyunları Əməliyyat Komitəsi Oyunları tanıtdırıcı qısametrajlı reklam filmini hazırlayıb. 12 – 22 may 2017-ci il tarixlərində Azərbaycanın Bakı şəhərində keçiriləcək Oyunlardan öncə həmin film dörd qitəni əhatə edən 50-dən çox ölkədə yayımlanacaq.

Milyonlarla televiziya tamaşaçısının seyr edə biləcəyi bu qısametrajlı reklam filmi ruhla bədənin vəhdətində mükəmməlliyin ehtiramla bayram edilməsi, İslamda birlik, Azərbaycanın ölkə və xalq kimi mədəniyyəti və irsinin beynəlxalq səviyyəli çoxnövlü idman tədbiri ilə tərənnümü üzərində qurulub.

Azərbaycan mədəni irsinə ehtiramın digər nümunəsi musiqidə əksini tapıb. Melodiya ənənəvi kollektiv rəqs olan Yallının Qobustan ərazisində tapılmış, eramızdan əvvəlki dövrə məxsus zərb aləti Qavaldaşla çalınmasından qaynaqlanır.