ESTAFET/ Bu gün keçiriləcək iki qarşılaşma ilə futbol üzrə Azərbaycan Premyer Liqasında XVIII tura yekun vurulacaq. 

Günün ilk matçı Sumqayıtda baş tutacaq. Eyniadlı komanda mövsümün sürprizi “Zirə”ni qəbul edir. “Gənclik şəhəri” təmsilçisi qələbə qazanmaqla həm 4-cü pillədəki mövqeyini möhkəmlətmək, həm də 3-cü yerdəki rəqibinə yaxınlaşmaq niyyətindədir. Həmçinin “Zirə” də liderlərdən uzaq düşməmək üçün eyni məqsədlə meydana çıxacaq.

Çempionluğa iddialı “Neftçi” autsayder “Sabah”ı sınağa çəkəcək. Bir gün əvvəl “Qarabağ” qələbə qazandığından, flaqman liderliyini qaytarmaq üçün mütləq qalib gəlməlidir. Əks təqdirdə, “Sabah” sonuncu yerdən qurtularaq, iki pillə irəliləyə bilər.

Qeyd edək ki, turun ilk günündə “Qarabağ” – “Qəbələ”ni 3:0 hesabı ilə məğlub edib, “Səbail” isə “Keşlə” ilə bərabərə qalıb (1:1).

Premyer Liqa
XVIII tur
3 mart 2021

16:00  “Sumqayıt” - “Zirə”
Hakimlər: İnqilab Məmmədov, Pərvin Talıbov, Vüqar Bayramov, Fərid Hacıyev
“Kapital Bank Arena”

18:15  “Neftçi” - “Sabah”
Hakimlər: Rəşad Əhmədov, Cavanşir Yusifov, Rahil Ramazanov, Elçin Məsiyev
“Bakcell Arena”