ESTAFET/ Bu axşam Londonun şərqində yerləşən "Village Undergrand" konsert-sərgi mərkəzində Formula1 komandalarından olan "Williams" 2018-ci il üçün nəzərdə tutduğu bolidi - FW41-i təqdim edib.Xarici görünüşünə görə yeni bölid sələfindən xeyli fərqlənir. Yeni modelin hazırlanmasında komandanın texniki direktoru Peddi Lou, ötən ilin əvvəlindən komandaya qoşulan aerodinamika şöbəsinin rəhbəri Dirk de Bir və baş mühəndis Ed Vud aktiv iştirak ediblər.

Xatırladaq ki, "Williams" komandası ilk yarışına 1977-ci ildə çıxıb və bu il də ənənəvi adla davam edir. Britaniya təmsilçisi çempionatda ümumilikdə 114 qələbə, 7 Sürücülər və 8 Mühəndislər Kuboku qazanıb. Formula1-in ən titullu ikinci komandası son iki mövsümü 5-ci yerdə bitirmişdi.

Yeni bolidin ön tərəfində S kanalı var. Bolidin burnunun altı və saydpodun qarşısı qapalı görünür. Saydpodun girişi isə "Ferrari"nin keçənilki dizaynı formasında hazırlanıb. 

Kler Uilyams - komanda rəhbərinin müavini: “Geri dönüşümüzə və yeni sürücü heyətimizə görə həyəcanlıyam. Komanda uzun müddətdir ki, FW41-in üzərində işləyir. Lens və Sergeyi sükan arxasında görmək üçün səbirsizlənirəm. Lens keçən il təsiredici performans göstərdi. İlk mövsümü olsa da, Felipeyə az fərqlə məğlub oldu. Bundan başqa podiuma yüksəldi və ön qrupdakı üç komandadan başqa podiuma yüksələn yeganə komanda olduq. Bu il isə performansımızı artırmaq istəyirik.

Bundan başqa mükəmməl performans göstərən Sergeylə Robertin komandaya qoşulmasından razıyam. Komanda onlarla daha güclü olacaq. Sergey texniki heyəti təəccübləndirdi. Onu yarışdırmağımız əla oldu. Robert də komanda ilə yaxından işləyərək, bolidin inkişafına kömək edəcək. Bütün komanda bolidin inkişafı üçün əlindən gələni etdi. Bundan başqa fanlarımıza və tərəfdaşlarımıza təşəkkür edirəm”.

Peddi Lou - komandanın texniki direktoru: “FW41-i ilk dəfə numayiş etdirmək həyəcanvericidir. Boliddə çoxlu yenilik var və əksəriyyəti o dəqiqə görünmür. Dəyişikliklər hesabına güclənməyi hədəfləyirik. Bütün Formula1 bolidləri əvvəlkinin təkmilləşmiş versiyasıdır. Amma FW41 çox sahədə fərqlənir. Ümumilikdə maksimumu almaq üçün yeni fəlsəfə ilə işləməyə başladıq. Formula1 bolidini hazırlayarkən aerodinamika, bünövrə və ağırlıq 3 əsas ünsürdür. Mercedes güc qurğusunu təkmilləşdirdiyi üçün şassidə radikal dəyişikliklər etdik. Bu işlərin nəticəsində FW41-i təqdim edirik. Bu bolidlə keçənilki performansımızı yaxşılaşdırmaq istəyirik”.

Lens Stroll - komandanın pilotu: “Yeni mövsümdən əvvəl cavabsız suallar çox olur. Bu da vəziyyəti daha həyəcanlı edir. Komanda ilə keçirdiyim bir mövsümdən sonra yenidən sükan arxasına keçmək üçün səbirsizlənirəm. Trasa çıxana qədər komandalar arasındakı fərqi bilmək olmaz. Bolid barədə müsbət düşünürəm. Keçən il mənim üçün öyrənmə müddəti idi. Görək yeni mövsüm necə olacaq”.

Sergey Sirotkin - komandanın pilotu: “Yeni mövsümdən əvvəl həyəcanlıyam. Bazada çox vaxt keçirdim. Demək olar ki, orada yaşayıram. Bu həm mənim üçün, həm də komanda üçün əlavə motivasiyadır. Mexaniklər və mühəndislərlə işləməkdən həzz aldım. Hər şey qaydasındadır. Çox işləyirəm və davamlı olaraq simulyatorda vaxt keçirərək fərqli sazlanmalar sınayıram. Bolidi fərqli traslarda sürürəm. Mühəndislərin iclaslarına qatılıram və hamı ilə söhbət edirəm. Bundan həzz alıram. Yaxşı nəticələr almağa hazıram”.

Robert Kubitsa - komandanın ehtiyat pilotu: “Formula1-ə başqa vəzifə ilə qayıdıram. Lakin həmişə padokda olacam və bunun üçün səbirsizlənirəm. Daha əvvəl getdiyim yerlərə qayıtmaq maraqlı olacaq. Bəzən başqalarının yarışmasına baxmaq çətin olacaq. Amma başqa işdəyəm. Bizi çətin mövsüm gözləyir. İşimi ən yaxşı formada görməliyəm. Artıq mövsüm başlasın!”