ESTAFET/ Bakı 2017 İslam Həmrəyliyi oyunlarına 55 gün qaldı. Açılış mərasimi 12 May tarixində Olimpiya stadionunda keçiriləcəkdir. 55 gün qaldığı ərəfədə oyunların ilk biletləri Azərbaycan Prezidenti İlham Əliyevə və Birinci vitse-prezident, eyni zamanda Bakı 2017 Təşkilat Komitəsinin Sədri Mehriban xanım Əliyevaya təqdim olundu.

Biletlərin təqdimatı Novruz bayramına təsadüf etdiyi üçün, Azərbaycan Prezidenti və Birinci vitse-prezident xalqla birlikdə gecə ilə gündüzün bərabərləşməsi ilə yeni ilin gəlişi - Novruz bayramını qeyd edirdi, bu zaman Bakı 2017-nin iki könüllüsü onlara yaxınlaşıb, biletləri təqdim etdi.

Bakı 2017 İslam Həmrəyliyi Oyunlarına biletlərin ümumi satışı 19 mart (bazar günü) tarixində reallaşacaq. Bu münasibətlə Gənclik Mall-da idmançı və ulduz səfirlər: İlham Zəkiyev, Fəridə Əzizova, Tünzalə Ağayeva və Hacı Nuran və Bakı 2017 Maskotları-İncə və Cəsurun iştirakı ilə xüsusi tədbir təşkil olunacaq. Tədbir zamanı tamaşaçılar idman sessiyaları və konsert proqramlarına qoşulmaq üçün müxtəlif müsabiqələrdə iştirak edərək, bilet qazanmaq imkanı əldə edəcəklər.

Cəmi 500,000 bilet satışa çıxarılacaq. Bakı 2017 islam Həmrəyliyi Oyunlarında azarkeşlər 20 idman növü və 170 idman sessiyasını izləmək imkanı əldə edəcək. Bütün idman sessiyaları üçün biletin qiyməti 2-5 AZN arasında dəyişəcək.

Bakı 2017 təşkilatçıları biletləri Bakı 2015 Avropa Oyunlarında olduğu kimi münasib və əlverişli qiymətlərlə satılmasını təmin edəcək ki, daha çox ailələr və gənc azarkeşlər bu yazda baş tutacaq heyrətamiz idman yarışından zövq ala bilsin. Bakı 2017, 16 yaşına kimi bütün gənc nəsli güzəştli biletlərdən yararlanmağa səsləyir, belə ki, 13 idman sessiyalarına onlar pulsuz buraxılacaq. 2-16 yaşlı uşaqlar üçün Heydər Əliyev adına arena, Milli Gimnastika arenası və Tofiq Bəhramov adına stadionlara təyinatlı biletlərin qiyməti 1 AZN olacaq.

Möhtəşəm Bakı Olimpiya Stadionu dünyanın hər yerindən gələn idman həvəskarlarını 12-22 may tarixlərində Bakı 2017 tərəfindən təşkil olunacaq Açılış və Bağlanış mərasimlərində salamlayacaq. Açılış mərasiminə biletin qiyməti 20-200 AZN civarında, Bağlanış mərasimi üçün isə 10-100 AZN civarında dəyişəcək.

İdman həvəskarlarının nəzərinizə çatdırırıq ki, Bakı 2017 İslam Həmrəyliyi Oyunları üçün biletləri Bakı 2017 rəsmi elektron vebsaytı - tickets.baku2017.com vasitəsilə, yaxud Bakının müxtəlif yerlərində quraşdırılacaq 12 satış məntəqəsindən əldə edilə bilər.

Qeyd edək ki, bütün İslam dünyasını birləşdirən maraqlı idman tədbiri olan 4-cü İslam həmrəyliyi oyunları mayın 12-22-də Bakıda keçiriləcək. Müsəlman ölkələrini təmsil edən idmançılar on yarış günü ərzində öz ölkələrini idmanın 20 növü (23 kateqoriya) – atletika və para-atletika, su idmanı növləri (suyatullanma, üzgüçülük, su polosu), basketbol 3×3, futbol, idman gimnastikası, bədii gimnastika, uşu, stolüstü tennis, həndbol, cüdo və görmə qabiliyyəti olmayanlar üçün cüdo, yunan-Roma güləşi, sərbəst güləş, atıcılıq, tennis, voleybol, boks, zorxana, karate, taekvando, ağır atletika üzrə 16 müasir idman qurğusunda keçiriləcək yarışlarda mübarizə aparacaqlar.