ESTAFET/ Futbol üzrə Azərbaycan Premyer Liqasının XXV turunda “Sumqayıt”la (2:0) oyunda “Neftçi”nin heyətində debüt edən Rüfət Abbasov klubun rəsmi saytına müsahibə verib.

17 yaşlı futbolçu “Neftçi”nin formasını geyinməklə uşaqlıq arzusuna çatdığını bildirib.

- “Neftçi” kimi köklü klubun yetirməsi olmaq nə deməkdir?
- Bu mənə həm əlavə motivasiya, həm də qürur hissi verir.

- Bundan əvvəl əsas komandanın formasını sınaq matçlarında geyinmişdinsə, “Sumqayıt”la görüşdə ilk dəfə olaraq rəsmi oyunda meydana çıxdın. 17 yaşında bunu yaşamaq necə hissdir?
- “Neftçi”nin formasını geyinmək uşaqlıq arzum idi. Bu günə qismət imiş. 17 yaşında “Neftçi” kimi köklü klubda, Azərbaycanın flaqmanında forma geyinmək mənim üçün fəxrdir. Olduqca qürürverici hissdir.

- Ümumilikdə yaxşı təsir bağışlasan da, bəzən ilk rəsmi matçın həyəcanı hiss olunurdu. Öz oyunundan razısan?
- İlk rəsmi oyunum olduğu üçün, əlbəttə, həyəcan var idi. Əlimdən gələnin ən yaxşısını edib məşqçilərimin etimadını doğrultmağa çalışdım. Öz üzərimdə daha çox işləməliyəm. Bu formanı geyinməyin haqqını vermək üçün maksimum səylə öz üzərimdə çalışacağam.

- Premyer Liqanın növbəti turunda “Qəbələ” ilə səfər oyununa hazırlıq necə gedir?
- Yüksək səviyyədə gedir. Məşqçilərimiz bizi matça hazırlaşdırır. Məqsədimiz odur ki, Qəbələ səfərindən qələbə ilə qayıdaq.

- Hər görüşdə olduğu kimi, “Sumqayıt”la səfər matçında da azarkeşlər komandanın yanında idilər. Onlara sözün varmı?
- Bizə verdikləri möhtəşəm dəstəyə görə azarkeşlərə minnətdarlığımı bildirirəm. Həmişə onların yanımızda olması bizə əlavə güc, stimul verir. Bir sözlə, onlar həmişəki kimi möhtəşəm idilər.