ESTAFET/ Xəbər verdiyimiz kimi, yunan-Roma güləşçisi Rəsul Çunayev ölkə mətbuatına verdiyi son açıqlamasında başqa ölkənin bayrağı altında çıxış etmə ehtimalının olduğunu bildirmişdi. Bununla bağlı Azərbaycan Güləş Federasiyası bəyanat yayıb. Bəyanatı olduğu kimi diqqətinizə çatdırırıq:

Rəsul Çunayev uzun illər yunan-Roma güləşi üzrə yığma komandanın əsas üzvlərindən biri olub və yüksək nəticələrə imza atıb. Onun sonuncu uğuru 2018-ci ildə Macarıstanda keçirilən dünya çempionatında qazandığı bürünc medaldır. Təəssüf ki, zədələr və səhhətində yaranan problemlərə görə, Çunayev sonraki illərdə bir çox təlim-məşq toplanışlarını buraxıb. Bu isə beynəlxalq yarışlarda uğurlarını davam etdirməsinə imkan verməyib.

Rəsul sonuncu dəfə 2021-ci ilin mayında Bolqarıstanda keçirilən Dünya Olimpiya Təsnifat turnirində iştirak edib. Həmin yarışda 67 kq-da Olimpiadaya vəsiqə qazana bilməyən Çunayev yığma komandanın növbəti toplanışlarında iştirak etməyib və yalnız fərdi məşqlərlə kifayətlənib. Ümumiyyətlə, Rəsul son illər Azərbaycan çempionatına da qatılmır.

Qeyd edək ki, Azərbaycan Güləş Federasiyası titullu idmançını milli komandadan uzaqlaşdırmayıb. R.Çunayev özü yığmanın təlim-məşq toplanışlarında iştirak etməmək qərarı verib.

Onu da nəzərinizə çatdıraq ki, hal-hazırda 77 kq-da ölkəmizi Olimpiadada təmsil edə biləcək kifayət qədər güclü güləşçimiz var. Dünya və 3 qat Avropa çempionu, Olimpiadanın bürünc medalçısı Rafiq Hüseynov və Avropa çempionu Sənan Süleymanov bu çəkidə favoritlərdən sayılır. Ancaq Rəsul Çunayev də təlim-məşq toplanışlarında iştirak edərək və forma yığaraq bu çəki dərəcəsində iddiasını ortaya qoya bilər. Beynəlxalq yarışlarda iştirakçıların seçimi sağlam rəqabət prinsiplərinə əsasən aparılır və kim daha hazır və daha yaxşı formada olursa, o da turnirlərdə ölkəmizi təmsil edir.