ESTAFET/ Bu gün UEFA Çempionlar Liqasının qrup mərhələsində sonuncu - 6-cı tura start veriləcək.

İlk oyun günündə A, B, C və D qruplarında keçiriləcək 8 oyundan sonra 1/8 finalın daha 2 iştirakçısı bəlli olacaq.

A qrupunda pley-offa vəsiqəni təmin etmiş iki komanda - "Liverpul"la "Napoli" İngiltərədə üz-üzə gələcək. Bu qarşılaşma yalnız qrup liderliyini müəyyənləşdirmək baxımından önəm daşıyır. Qrupun digər görüşündə isə "Ayaks" Şotlandiyada "Reyncers"in qonağı olacaq. Amsterdam təmsilçisi 4 top fərqi ilə uduzsa belə, Avropa Liqasının pley-offuna vəsiqə qazanacaq.

B qrupunda növbəti mərhələyə adlaması dəqiqləşən "Brügge" Almaniyada "Bayer"lə, "Portu" isə evdə Madrid "Atletiko"au ilə qarşılaşacaq. "Brügge" və "Portu" qrup liderliyi, "Bayer" və "Atletiko" isə 3-cü yer uğrunda mübarizə aparacaq.

C qrupunda bütün suallara aydınlıq gəldiyindən "Bayern" - "İnter" və "Viktoriya" - "Barselona" matçları formal xarakter daşıyacaq.

D qrupunda isə 4 komandanın hər birinin pley-off şansı davam edir. Portuqaliyada "Sportinq" və "Ayntraxt", Fransada isə Marsel “Olimpik"i və "Tottenhem" arasında keçiriləcək oyunlarda qələbə qazanan kollektivlər 1/8 finala yüksələcək. Hər iki görüşdə heç-heçə qeydə alınarsa, "Tottenhem" və "Sportinq" qrupdan çıxacaq. "Ayntraxt" isə yoluna Avropa Liqasında davam edəcək.

Daha öncə "Napoli", "Liverpul", "Brügge", "Portu", "Bayern" və "İnter"lə yanaşı, Almaniyanın "Borussiya" (Dortmund), İspaniyanın "Real", Fransanın PSJ, Portuqaliyanın "Benfika", İngiltərənin "Mançester Siti" və "Çelsi" komandaları da pley-offa vəsiqəni təmin ediblər.

UEFA Çempionlar Liqası
Qrup mərhələsi, 6-cı tur
1 noyabr 2022

A qrupu

00:00. Liverpul (İngiltərə) - Napoli (İtaliya)
00:00: Reyncers (Şotlandiya) - Ayaks (Niderland)

Xal: Napoli - 15 . Liverpul - 12. Ayaks - 3. Reyncers - 0.

B qrupu

21:45. Portu (Portuqaliya) - Atletiko (Madrid, İspaniya)
21:45. Bayer (Almaniya) - Brügge (Belçika)

Xal: Brügge - 10. Portu - 9. Atletiko - 5. Bayer - 4.

C qrupu

00:00. Bayern (Almaniya) - İnter (İtaliya)
00:00. Viktoriya (Plzen, Çexiya) - Barselona (İspaniya)

Xal: Bayern - 15. İnter - 10. Barselona - 4. Viktoriya - 0.

D qrupu

00:00. Sportinq (Portuqaliya) - Ayntraxt (Frankurt, Almaniya)
00:00. Olimpik (Marsel, Fransa) - Tottenhem (İngiltərə)

Xal: Tottenhem - 8. Sportinq - 7. Ayntraxt - 7. Olimpik - 6.