ESTAFET/ Tovuz Gənclər Evində qurumun direktoru, Azərbaycan İdman Jurnalistləri Assosiasiyasının (AİJA) və Beynəlxalq İdman Mətbuatı Assosiasiyasının üzvü Rauf Rüstəmovun moderatorluğu ilə gender bərabərliyi mövzusunda təlim keçirilib.

AZƏRTAC xəbər verir ki, qadın güləşi üzrə 4 qat Olimpiya mükafatçısı, 2 qat dünya, 8 qat Avropa çempionu Mariya Stadnik, AİJA prezidenti, Əməkdar jurnalist Eldar İsmayılov, AİJA və AİPS üzvü “Olimpsport” jurnalının baş redaktoru Ramin Allahverdiyev çıxış edərək tədbir iştirakçılarını salamlayıblar.

Gənc mütəxəssis Təbriz Qasımovun müxtəlif fəaliyyət və məişət sferalarında gender balansının qorunmasına dair təlimi maraqla dinlənilib. Fəxri qonaqlarla salona toplaşan gənc və yeniyetmələr arasında maraqlı söhbətlər, polemikalar, sual-cavablar, xatirə fotoları, daha sonra Tovuz Gənclər Evi, rayonun olimpiya-idman kompleksi ilə tanışlıq, əhalinin müxtəlif təbəqələrinin maraq dairəsinə uyğun hər cür şəraitin yaradılması diqqət çəkib.