ESTAFET/ 3-4 dekabr 2022-ci il tarixində Tofiq Bəhramov adına respublika stadionunun güləş zalında Şuşa rayon Uşaq və Gənclər İdman Məktəbinin 2011-2013-cü il təvəllüdlü oğlanlar arasında yunan-Roma güləşi üzrə açıq birinciliyi keçirilib.

Yarışın rəsmi açılış mərasimində Azərbaycan respublikasının dövlət himni səsləndirilib və şəhidlərin ruhu bir dəqiqəlik sükutla yad edilib.

Tədbiri giriş sözü ilə açan məktəbin direktor müavini, yarışın baş katibi Cavid Allahverdiyev qonaqları və idmançıları salamlayıb və bu yarışların mütəmadi olaraq digər idman növləri üzrə də keçiriləcəyini qeyd edib.

Yarışda Bakı, Sumqayıt, Şəmkir, Lənkəran, Masallı, Göyçay, Balakən, Mingəçevir, Şirvan şəhər və rayonları olmaqla, ümumilikdə 16 komandanın 200-ə yaxın idmançısı iştirak edib.

Sonda komanda hesabında 1-ci yeri Şuşa Uşaq və Gənclər İdman Məktəbi, 2-ci yeri Sumqayıt, 3-cü yeri Mingəçevir komandaları tutub.