DOST İnklüziv İnkişaf və Yaradıcılıq Mərkəzində Niderlandda keçiriləcək Avropa Paralimpiya Çempionatı və Birləşmiş Krallıqda keçiriləcək IBSA Dünya Oyunlarına qatılacaq Azərbaycan nümayəndə heyəti və idmançılarla görüş keçirilib.

Tədbirdə Milli Paralimpiya Komitəsinin prezidenti Hidayət Abdullayev, vitse-prezident İlham Zəkiyev, məşqçilər, idmançılar və Komitə əməkdaşları iştirak ediblər.

Hidayət Abdullayev həssas qrupdan vətəndaşlarımıza dövlət qayğısının nəticəsi olaraq, əlilliyi olan idmançılarımızın xüsusi diqqətlə əhatələndiyini qeyd edib, milli idmançılarımızın qarşıdan gələn mötəbər yarışlarda uğur qazanacağına əmin olduğu vurğulayaraq, uğurlar arzulayıb. Komitə prezidenti “Paris-2024” XVII Yay Paralimpiya Oyunlarına cəmi bir il vaxt qaldığını xatırladaraq, qalan müddət ərzində idmançılarımızın beynəlxalq yarışlarda reytinq xalları və lisenziyalar qazanmaqlarını olduqca vacibliyibi bildirib.

Komitənin vitse-prezidenti İlham Zəkiyev yarışlarda iştirak edəcək idmançılarımızın fiziki və psixoloji hazırlığının yüksək olduğunu qeyd edib.

Digər çıxış edənlər da idmançılarımıza uğurlar arzulayıb və hər iki mötəbər yarışdan idmançılarımızın yüksək nəticələrlə vətənə qayıdacaqlarına inamlarını vurğulayıblar.

Qeyd edək ki, 08-20 avqust tarxilərində Niderland Krallığının Rotterdam şəhərində keçiriləcək Avropa Paralimpiya Çempionatına komandalarımız avqustun 6-dan etibarən yola düşəcək.
Rotterdamda keçiriləcək Avropa Paralimpiya Çempionatında 45 ölkədən 1500-ə yaxın idmançı iştirak edəcək. Bu yarışlarda ölkəmizi 35 idmançı 7 idman növü üzrə təmsil edəcək. Güllə atıcılığı və kamandan oxatma - birbaşa lisenziya, digər idman növləri reytinq xalları qazandırır.

18-27 avqustda Birmingemdə keçiriləcək IBSA Dünya Oyunlarında isə 1250 idmançı iştirak edəcək. Bu yarışlarda ölkəmizi 20 idmançı 2 idman növü (16 idmançı cüdo, 4 idmançı şahmat) üzrə təmsil edəcək. Cüdo idman növündə əldə olunacaq nəticələr XVII Paralimpiya Oyunlarına lisenziya üçün reytinq xalı qazandıracaq.