ESTAFET/ Azərbaycan Cüdo Federasiyasının qarşısında duran prioritet məsələlərdən biri də regionlarda bu idman növünün kütləviliyi və inkişaf etdirilməsidir. Federasiyanın dəstəyi ilə bir neçə bölgədə cüdo zalları yaradılıb, standartlara tam cavab verən tatamilər düzülüb, yeniyetmələrə kimanolar verilib, yerli mütəxəssislər və məşqçilər işlə təmin olunublar. Artıq respublikamızın bütün regionlarında cüdo üzrə zona birincilikləri keçirilib, perespektivli yeniyetmələr ölkə çempionatlarında mübarizə aparıblar.

Azərbaycan Cüdo Federasiyasının dəstəyi ilə növbəti yarış Göyçayda keçirilib.

Yarışdan öncə seminar keçirilib. Seminarda cüdonun yeni qayda və qanunlarının tədbiqi əyani şəkildə göstərilib, geniş müzakirə edilib, fikir mübadilələri aparılıb.

Regionlar arası "Federasiya kuboku" uğrunda turnir bu ilin sentyabrında Bakıda baş tutacaq cüdo üzrə dünya çempionatının təbliğinə həsr olunub. Region yarışında iki yarımqrupda, 6 komanda – “Bakı-1”, “Bakı-2”, “Bakı-3”, “Sumqayıt-2”, “Şimal-1” və “Cənub-1” mübarizə aparıb. "Bakı-1” və “Bakı-2” komandaları növbəti region yarışında iştirak etmək üçün finala vəsiqə qazanıblar.

Qeyd edək ki, növbəti finala çıxmaq üçün yarış iyun ayında Şamaxıda keçiriləcək. Final görüşləri isə həmin ayda Göygöl rayonunda baş tutacaq.