ESTAFET/ "Neftçi"nin məşqçisi Füzuli Məmmədov futbol üzrə Azərbaycan Topaz Premyer Liqasının VI turunda "Səbail"ə evdə 4:0 hesabıyla qalib gəldikləri oyundan sonra mətbuat konfransı keçirib. Sport24.az xəbər verir ki, cəzalı italiyalı baş məşqçi Roberto Bordini əvəzləyən 41 yaşlı mütəxəssis öncə matç haqda danışıb.

- Hesab 4:0 olsa da, çətin matç oldu. Yaxşı hazırlaşmışdıq və meydana qələbə üçün çıxmışdıq. Futbolçular tapşırıqları maksimum yerinə yetirdilər. Hamıya dəstəyə görə minnətdarıq. Hər kəsə baş məşqçimiz Roberto Bordinin adından təşəkkür edirəm.

- Bordinlə dialoqlarımız çox vaxt yaxşı alınmır. Bəlkə siz məni başa düşəsiniz. Rəhman Hacıyevlə Namiq Ələsgərova nə çatmır ki, əsas heyətdə oynasınlar?

- Hər ikisi bizim üçün dəyərli futbolçudu. Namiq zədədən yeni qayıdıb. Ona tam hazır olması üçün vaxt lazımdı. Rəhmana gəlincə, bu gün qərar verildi ki, start heyətində Emin Mahmudov olsun. Hacıyev son 2 oyunda ilk dəqiqələrdən meydanda olmuşdu. Ancaq bu gün əvvəldən ehtiyatdan qatılması məqsəduyğun sayıldı.

- "Neftçi"nin əsas heyəti həftəlik məşq nəticəsinə əsaəsn qərar verilir?

- Əlbəttə. Rəqibi, hər şeyi nəzər alaraq start heyəti müəyyənləşdiririk. Kim hazır olsa, ona ilk dəqiqələrdən şans veririk.

- Bu gün Mirabdulla Abbasovu start heyətində gördük. Onun ilk dəqiqələrdən meydanda olması "Neftçi"nin işini asanlaşdırır, yoxsa..?

- Mirabdulla İndi yaxşı formadadı. Ona görə əsas heyətdə yer alır. Karikari də yaxşı futbolçudu. Lazım olanda onu buraxırıq, lazım olanda Mirabdullanı. Elə oyun olur ki, bütün nüansları nəzərə alırıq. Rəqibi analiz edərək planımızı qururuq.

- Bordin oyunun gedişində hansı tapşırıqları vermişdi?

- Bordin bizə yaxın oturmuşdu və bütün oyunboyu tapşırıqlarını verirdi. Biz də onları komandaya çatdırırdıq. Baş məşqçimiz ortada daha etibarlı oynamağı, rəqibin səhvlərindən istifadə edərək qol vurmağı tapşırmışdı.

- Belə çıxır ki, bütün əvəzetmələri də baş məşqçiniz edirdi?

- Bəli.

- "Neftçi"nin Müşahidə Şurasının sədri Çingiz Abdullayev oyundan sonra gəlib komandanı təbrik etdi?

- O, bu gün yox idi. Ancaq klubun prezidenti, rəhbərlik gəlib təbriklərini çatdırdı ki, buna görə onlara minnətdarıq.