ESTAFET/ Bu gün Rumıniyanın paytaxtı Buxarestdə güləş üzrə Avropa çempionatı start götürüb.

İlk yarış günündə 57, 65, 70, 79 və 97 kq-da çıxış edən sərbəst güləşçilər mübarizəyə başlayıb. Mahir Əmiraslanov startda Moldova təmsilçisinə qalib gəlsə də, 1/4 finalda Türkiyə güləşçisinə uduzub. Türk pəhləvan finala adlayacağı təqdirdə güləşçimiz bürünc üçün təsəlliverici görüşlərə qatılacaq. 

Üçqat dünya və ikiqat Avropa çempionu Hacı Əliyev startda Belarus, daha sonra Ermənistan idmançısına qalib gəlib. 1/4 finalda Rusiya güləşçisinə də gücünü göstərən Hacı adını yarımfinala yazdırıb.

Ağahüseyn Mustafayev Avropa çempionatına möhtəşəm başlayıb. Ardıcıl iki dünya çempionunu - Rusiya və Ermənistan təmsilçilərini məğlub edən yığma üzvü yarımfinala adlayıb.

Millimizin kapitanı Cəbrayıl Həsənov qitə birinciliyinə inamlı start verib. Startda gürcü güləşçi üzərində əzmkar qələbə qazanan ikiqat Avropa çempionu ardınca Almaniya idmançısını tam üstünlüklə məyus edib və yarımfinala yüksəlib.

Püşkdə bəxti gətirməyən Nurməhəmməd Hacıyev startda olimpiya, dünya və Avropa çempionu Abdulrəşid Sadullayevlə qarşılaşıb və uduzub. İndi o da Mahir kimi rəqibinin finala yüksəlməsini gözləmək məcburiyyətindədir. 

Qeyd edək ki, yarımfinal görüşləri Bakı vaxtı ilə 19:00-da başlayacaq.

57 kq
1/8 final: Mahir Əmiraslanov - Aleksandru Kirtoaka (MDA) 9:7
1/4 final: Mahir Əmiraslanov - Süleyman Atlı (3:6)

65 kq
Təsnifat: Hacı Əliyev - Hüseyn Şaxbanov (BLR) 7:2
1/8 final: Hacı Əliyev - Vazgen Tevanyan (ARM) 1:0
1/4 final: Hacı Əliyev - Naçin Kular (RUS) 5:3
Yarımfinal: Hacı Əliyev - Maksim Sakultan (MDA)

70 kq
Təsnifat: Ağahüseyn Mustafayev - Məhəmmədrəsul Qazıməhəmmədov (RUS) 5:3
1/4 final: Ağahüseyn Mustafayev - David Safaryan (ARM) 12:2
Yarımfinal - Ağahüseyn Mustafayev - Nikolae Koyokaru (GBR)

79 kq
Təsnifat: Cəbrayıl Həsənov - Nika Kentçadze (GEO) 6:5
1/4 final: Cəbrayıl Həsənov - Franko Mario Buettner (GER) 12:1
Yarımfinal: Cəbrayıl Həsənov - Andrey Karpaç (BLR)

97 kq
1/8 final: Nurməhəmməd Hacıyev - Abdulrəşid Sadullayev (RUS) 0:3