Belçika çempionatı davam etdirilməyəcək

ESTAFET/ Futbol üzrə Belçika çempionatının qalan oyunları keçirilməyəcək. Koronavirus pandemiyası səbəbindən dayandırılan yarış vaxtından əvvəl yekunlaşdırılacaq.

Belçika Milli Təhlükəsizlik Şurası ölkədə peşəkar futbol yarışlarının iyulun 31-dək keçirilməsini qadağan edib. Bu isə yüksək liqa və ölkə kubokunun dayandırılması deməkdir. Son qərar mayın 15-də veriləcək. Həmin gün “Brügge”nin çempionluğunun rəsmiləşəcəyi, həmçinin növbəti mövsüm avrokuboklarda iştirak edəcək komandaların adlarının açıqlanacağı gözlənilir.

Belçikada növbəti mövsümün avqustun 8-də başlaması planlaşdırılır.

Qeyd edək ki, daha öncə Avropanın aparıcı ölkələrindən Fransa və Niderland da eyni addımı atıb. (apasport.az)

Müəllif: Bəhruz MƏMMƏDOV