Gürcüstanın paytaxtı Tbilisi şəhərində “WTT YOUTH CONTENDER TBILISI” turniri davam edir. Bu gün idmançılarımız daha iki yaş qrupunda mübarizəyə qatılıblar. 15 yaşadək tennisçilərin turnirində uğurla çıxış edən Adil Əhmədzadə qrup mərhələsində Gürcüstan və Birləşmiş Ərəb Əmirlikləri təmsilçilərinə qalib gələrək 1/16 finala yüksəlib.

Eyni yaş qrupunda qüvvəsini sınayan Rüstəm Hacılı ilə Hüseyn Eylazov da etimadı doğruldub. Eylazov Belçika və Qazaxıstan, Hacılı Birləşmiş Ərəb Əmirlikləri və Qazaxıstan idmançıları ilə mübarizədən qrup lideri kimi 1/16 finala vəsiqə qazanıb.

Onur Quluzadə isə, 11 yaşadək tennisçilərin turnirində uğurla çıxış edib. O, qrup mərhələsində Qazaxıstan və Birləşmiş Ərəb Əmirlikləri idmançılarına qalib gələrək ¼ finala adlayıb. Sözügedən idmançılar mübarizəni sabah davam etdirəcəklər. Bu gün isə, Adil Əhmədzadə 17 yaşadək tennisçilərin ¼ final qarşılaşmasına çıxacaq.