İyunun 25-də şose velosipedi üzrə Azərbaycan çempionatına yekun vurulub. Azərbaycan Respublikası Gənclər və İdman Nazirliyi və Azərbaycan Velosiped Federasiyasının birgə təşkilatçılığı ilə Xızı rayonunda (Bakı - Giləzi - Xızı - Altıağac yolu) keçirilən yarışın son günündə 106 km məsafəyə qrup ötüşməsində Elit yaş kateqoriyasında kişilər arasında qaliblər müəyyənləşib.

Beynəlxalq Velosipedçilər İttifaqının (UCI) mövcud qaydalarına əsasən təşkil edilən yarışın nəticələrinə görə, Əli Qurbanov (Sakarya BB Pro Team, 02:51:54) finiş xəttini birinci keçərək fəxri kürsünün ən yüksək pilləsinə qalxıb.  Musa Mikayılzadə (MSN, 02:56:51) ikinci, Samir Cəbrayılov (ROEQİUGVM, 02:56:52) üçüncü yerdə qərarlaşıblar.

Nəzərinizə çatdıraq ki, iyunun 24-də isə yeniyetmə oğlanlar 60 km məsafəyə qrup ötüşməsində mübarizə aparıblar.

Ravi Rzayev birinci (ROEQİUGVM, 01:55:22), Artyom Proskuryakov (Təhsil RİM, 01:55:26) ikinci, Maksim Polikarpov (MTB, 01:55:31) üçüncü yerə layiq görülüblər.

Xatırladaq ki, ilk yarış günündə (23 iyun) fərdi ötüşmə növü üzrə bütün yaş kateqoriyalarında velosipedçilər arasında qaliblər müəyyənləşiblər.

Azərbaycan çempionatının nəticələri Beynəlxalq Velosipedçilər İttifaqına göndəriləcək, həm ölkənin, həm də idmançıların şəxsi reytinqində nəzərə alınacaq.