ESTAFET/ 2017/2018 futbol mövsümünə hazırlaşan "Sumqayıt" Futbol Klubu hazırlığın 2-ci mərhələsi üçün yollandığı Boluda növbəti yoxlama matçını keçirib. Komanda Səudiyyə Ərəbistanı təmsilçisi "Al-Fateh" klubu ilə üz-üzə gəlib. 

Qarşılaşma "Sumqayıt" Futbol Klubunun hücumları ilə başlayıb. İlk hissələrdən hücuma atılan komandamız hesabı 14-cü dəqiqədə açdı. Komandanın yeni transferi Rəşad Eyyubov cərimə zərbəsindən topu qapının "uzaq doqquzluğ"una göndərməklə baxımlı qola imza atıb. Oyunun 37-ci dəqiqəsində Rəşad Eyyubov ikinci dəfə fərqlənib. Fasilədən sonra heyətdə bir çox dəyişiklik edən baş məşqçi Samir Abasov bu oyunda bütün futbolçuları sınaqdan keçirdi.

İkinci hissə də "Sumqayıt"ın üstünlüyü ilə keçdi. Qarşılaşmanın 88-ci dəqiqəsində Tural Bayramlının cinah ötürməsindən sonra Ramil Həsənov başla vurduğu qolla oyunun hesabını rəsmiləşdirdi.

Yoxlama oyunu
Bolu, Von Resort Hotelinin stadionu

"Sumqayıt" FK - "Al-Fateh" 3:0
Qollar: Rəşad Eyyubov, 14, 37. Ramil Həsənov, 88.

"Sumqayıt" FK bu heyətlə çıxış edib: 23. Mehti Cənətov, 2. Rail Məlikov, 3. Vurğun Hüseynov, 19. Azər Salahlı, 18. Tural Axundov, 6. Vüqar Bəybalayev, 11. Ehtiram Şahverdiyev, 32. Rəşad Eyyubov, 7. Cavid Tağıyev, 10. Cavid İmamverdiyev, 9. Amil Yunanov.

Oyuna sonradan daxil olanlar: 31. Miremil Həsənov, 14. Bəxtiyar Həsənalızadə, 13. Bəhlul Mustafazadə, 8. Nicat Muxtarov, 90. Ramil Həsənov, 39. Tural Bayramlı, Məhəmməd Alıyev, Ramil Orucov, Kamal Mirzəyev, 97. Xəyal Nəcəfov.