Bakıda keçirilən atıcılıq üzrə “Dünya Kuboku 2024” davam edir.

Bu gün qarışıq komanda növündə stend atıcılığının dairəvi stend növü üzrə final yarışları keçirilib.

Üçüncü yer uğrunda mübarizədə ABŞ-ı təmsil edən Konner Prins və Austen Smit Avstraliyadan olan Eyslin Cons və Coşua Bell ikilisi ilə münasibətlərinə aydınlıq gətiriblər.

Həlledici atışlarda dəqiqlik nümayiş etdirən Avstraliya atıcıları  proqnozları alt-üst edərək bürünc medalları qazanıblar.

“Qızıl” uğrunda yarışda isə ABŞ-dan olan Danya Vizzi Co ilə Dastin Teylor Çilidən olan atletlər Fransiska Krovetto Çadid və Ektor Flores Barahona üz-üzə gəliblər.

Amerika qitəsini təmsil edən komandaların mübarizəsində 3 dəfə Olimpiya iştirakçısı olmuş Çadidin dəqiq atışları Çili komandasına qızıl medalları qazandırıb. ABŞ-ı təmsil edən cütlük turniri gümüş medallarla başa vurub.