“Ocaq Sport” klubunun kiçik üzvləri ilk dəfə olaraq fiqurlu konkisürmə üzrə beynəlxalq yarışlarda iştirak edəcəklər.

Azərbaycan Gimnastika Federasiyasından verilən məlumata görə, klubun gənc fiquristləri dekabrın 5-6-da Özbəkistanın Daşkənd şəhərində keçiriləcək turnirə hazırlıq məqsədilə Heydər Əliyev adına İdman-Konsert Kompleksinin buz arenasında kontrol məşqlərə başlayıblar.

Klubun nümayəndələri qeyd ediblər ki, “Ocaq Sport” fəaliyyəti boyunca gimnastika üzrə böyük uğurlar əldə edib. Ötən ildən etibarən klub fiqurlu konkisürmə də daxil olmaqla yeni idman növlərinə diqqət ayıraraq ölkədə qış idman növlərinin inkişafına töhfə verməkdədir.

“Bu beynəlxalq iştirak yalnız kiçik fiquristlərimizin deyil, bütövlükdə Azərbaycanın idman sahəsində yeni imkanlar üçün təkan olacaq. Bu qısa müddət ərzində klub məşqçi heyətinin koordinasiyalı fəaliyyəti, idmançıların əzmkarlığı və valideynlərin dəstəyi ilə qış idmanlarının populyarlaşması üçün möhkəm baza yaradıb,” – deyə klub nümayəndələri vurğulayıb.

Kiçik idmançıları qarşıda zəngin yarışlar gözləyir. Bu turnir onların hazırlığını və Azərbaycanın gənc fiquristlərinin istedadını nümayiş etdirmək üçün əhəmiyyətli bir platforma olacaq.