İdmançılarımız akrobatika gimnastikası üzrə Avropa çempionatında növbəti uğura imza atıblar. Aprelin 13-də baş tutan yarış günündə Azərbaycan komandası 1 qızıl, 1 gümüş və 2 bürünc medal əldə edib.

Qızıl medal sevincini isə qarışıq cütlük yaşadıb – Raziyə Seyidli və Ağasif Rəhimov temp hərəkətləri proqramı üzrə Avropa çempionu elan olunublar. Onların çıxışı yüksək qiymətləndirilib və turnirin ən parlaq performanslarından biri hesab olunub.

Gümüş medal isə kişi cütlüyümüzə qismət olub. Daniel Abbasov və Murad Rəfiyev balans hərəkətləri üzrə 28.570 xal toplayaraq ikinci yerə layiq görülüblər.

Yarışın digər iki bürünc medalı isə aşağıdakı komandalarımıza məxsusdur:

- Seymur Cəfərov, Abdulla Əl-Məşayxi, Riad Səfərov və Rəsul Seyidlidən ibarət kişi qrupu balans hərəkətlərində 27.830 xalla üçüncü yeri tutub.

- Zəhra Rəşidova, Nəzrin Zeyniyeva və Anahita Bashiridən ibarət qadın qrupu isə temp hərəkətləri üzrə 27.620 xalla bürünc medala sahib çıxıb.

Bu uğurlu nəticələr Azərbaycan akrobatika gimnastikasının inkişafının göstəricisi olmaqla yanaşı, ölkəmizi beynəlxalq arenada bir daha layiqincə təmsil etdiyimizi sübut edir.

Gimnastlarımızı təbrik edir, növbəti yarışlarda da uğurlar arzulayırıq!