ESTAFET/ Bu gün Macarıstanın paytaxtı Budapeştdə keçirilən idman gimnastikası üzrə yeniyetmələrin beynəlxalq turnirinə komandamız 8 medalla yekun vurub.

Respublika günü ərəfəsində millimizin perspektivli və gənc gimnastları iki dəfə himnimizi Budapeştin gimnastika arenasında səsləndirməyi bacarıblar.

Komandamızın hesabına ən çox medal yazdıranlardan biri Səməd Məmmədli olub. Təmsilçimiz dəstəli at üzərində çıxışlarına görə qızıl, dayaqlı tullanmada gümüş, parallel qollarda isə bürünc medala sahiblənib. Daha bir bürünc medalı isə gimnastımız çoxnövçülükdə qazanıb.

Növbəti qızıl medalı isə hesaba Cavidan Babayev halqalarda uğurlu çıxışı ilə yazdırıb.

Digər idmançımız Ramin Dəmirov da komanda yoldaşlarından geri qalmayaraq, öz yaş kateqoriyasında çıxışlarına görə halqalarda gümüş, çoxnövçülükdə isə bürünc medalla mükafatlandırılıb.

Ağamurad Qəhrəmanovun turnikdəki çıxışı isə onu fəxri kürsünün ikinci pilləsinə yüksəldib.