ESTAFET/ “Neftçi” yeni baş məşqçisi Laurentsiu Regekampfı ictimaiyyətə təqdim edib. Tədbir “Bakcell Arena”nın konfrans zalında baş tutub.

Rumıniyalı mütəxəssis median nümayəndələrinin suallarını cavablandırıb. 47 yaşlı mütəxəssis əvvəlcə paytaxt təmsilçisinin sükanı arxasına keçməsini dəyərləndirib: “Bu gündən yeni komandada işə başlayırıq. Konfrans Liqasında uğurlu çıxış etməyə və Premyer Liqada titul qazanmağa çalışacağıq. Bilirik ki, çətin olacaq. Amma həyatda asan heç nə yoxdur”.

- Avrokubok matçına bir aydan az vaxt qalıb. Bu qısa müddət sizə kifayət edəcək?
- Əlbəttə ki, vaxt azdır. Üstəlik, milli komandanın üzvləri də hələ bir neçə gündən sonra bizə qoşulacaqlar. İyulun 1-dən təlim-məşq toplanışına başlayacağıq. Bütün oyunçularımız o vaxt bir araya gələcək. Bura vaxtdan şikayətlənmək üçün gəlməmişəm. Vaxtla bağlı həmişə şikayətlər olub. Çünki zaman sürətlə keçir. Əminəm ki, Konfrans Liqasındakı ilk oyuna qədər tam hazır olacağıq. Bu gündən istədiyimiz komandanı qurmağa başlayırıq. Biz tərəfdən bu haqda məlumatlar alacaqsınız.

- Köməkçiləriniz müəyyənləşib? Onların arasında yerli mütəxəssis olacaqmı?
- Bütün köməkçilərimi özümlə Bakıya gətirmişəm və hazırda buradadırlar. Qərar versək ki, məşqçi heyətimdə yerli mütəxəssis işləməlidir, bu mövzuda heç bir problem yoxdur. Əvəzedici heyətin baş məşqçisi ilə yaxından əməkdaşlıq edəcəyəm. Çünki klubdakı hər bir gənc oyunçu haqda məlumat toplamalıyam. 

- "Neftçi"nin azarkeşləri çox tələbkardır. Bu təzyiq altında işləmək çətin olmayacaq?
- Bu, mənim üçün problem deyil. Çünki bütün komandalarda təzyiq altında işləmişəm. Onları başa düşürəm, yeni gələn məşqçinin komandaya uğur qazandırmasını istəyirlər. Təzyiqi özümə motivasiya sayıram və bundan oyunçularımı ayıltmaq üçün istifadə edəcəyəm. Azarkeşlər daim yanımızda olsunlar, bizi dəstəkləsinlər və təzyiq etsinlər. "Neftçi" ölkənin ən tanınmış klubudur.

- Rumıniya mətbuatında yayılan məlumata görə, aylıq məvacibiniz 40 min avro olacaq. Eyni zamanda transferlər üçün istədiyiniz qədər büdcə ayrılacaq?
- Müqavilə klubla aramızda olan mövzudur və bu haqda heç yerdə danışmıram. Maliyyə mövzusu hamını maraqlandırır. Amma bu məqalə həqiqəti əks etdirmir. ()