30 avqust - 5 sentyabr tarixlərində Belçikanın Hazevinkel şəhərində akademik avarçəkmə üzrə 23 yaşa qədər idmançılar arasında Avropa çempionatı keçirilib. Qitə birinciliyində 30 ölkədən 200-dən çox avarçəkən mübarizə aparıb.

Azərbaycanı bu yarışda yerli idmançımız, milli komandamızın üzvü Ziya Məmmədzadə təmsil edib. Təmsilçimiz yüngül çəkili avarçəkənlərin mübarizəsində 2000 metr məsafəyə keçirilən yarışlarda iştirak edib.

Təsnifat mərhələsində uğurlu çıxış edən Ziya Məmmədzadə yarımfinal mərhələsinə adlayıb. Yarımfinal yürüşlərinin yekununda təmsilçimiz B finalına vəsiqəni təmin edib. B finalında isə avarçəkənimiz finiş xəttinə 3-cü yerdə çatıb. Yekun nəticədə Ziya Məmmədzadə Avropa çempionatını 9-cu sırada başa vurub.