Parabadmintonçumuz İbrahim Əliyev yanvarın 21-dən 26-dək Misirin paytaxtı Qahirədə təşkil edilən Beynəlxalq Parabadminton Turnirini iki bürünc medalla başa vurub.

19 yaşlı gənc paralimpiyaçımız həm təklərin mübarizəsində, həm də türkiyəli Sedat Tumkaya ilə birlikdə çıxış etdiyi qoşa yarışda 2 bürünc medala yiyələnib.

İ.Əliyev təklərin qrup mərhələsində misirli və hindistanlı rəqiblərini məğlub edərək 1/8 finala vəsiqə qazanıb. İdmançımız ardıcıl iki mərhələdə hindistanlı rəqibləri üzərində qələbə qazanıb və yarımfinaladək irəliləyib.

Qoşa yarışda isə qrup mərhələsini misirli və hindistanlı rəqibləri üzərində iki qələbə ilə başa vuran İ.Əliyev və S.Tumkaya tandemi  1/4 finalda da hindistanlı rəqiblərini məğlub edib və turniri yarımfinalda başa vurub.

Qeyd edək ki, turnir "Grade 2" kateqoriyasına daxil edilən Beynəlxalq Badminton Federasiyasının təsnifat yarışıdır.