ESTAFET/ Bakı Şəhər Halqası (BŞH) Əməliyyat Şirkəti builki Formula 1 Azərbaycan Qran Prisi ilə əlaqədar görülən təşkilatçılıq işlərində yüksək fəallığı ilə seçilən 5 könüllünü – Nigar Pənahova, Hikmət Əlizadə, Rəna Göyüşova, Şəms Balayeva və Tural Özbəkzadəni 25-27 may tarixlərində baş tutacaq Monako Qran Prisinə göndərir.

Müsabiqənin keçirilməsində əsas məqsəd gənclər arasında könüllülük fəaliyyətinə maraq oyatmaq və Formula 1 yarışında yüksək fəallığı ilə fərqlənən könüllüləri mükafatlandırmaqdır.

BŞH-nin İnsan Resursları və İşçi Qüvvəsi şöbəsinin rəhbəri İranə Əhmədova qaliblərin nəzəri və praktiki yoxlamalar əsasında müəyyənləşdirildiyini bildirib: “Bakıda Formula 1 yarışı zamanı 3 min könüllü xidmət göstərib və onların arasından 260 nəfər xüsusilə fərqlənib. Daha sonra bu könüllülər arasında yarışa hazırlıq çərçivəsində təşkil olunmuş təlim və seminarlara dair nəzəri imtahan keçirilib. Ən yüksək bal toplayan 5 könüllü Monako Qran Prisinə səfər etmək haqqı əldə edib. Ümumilikdə bütün könüllülərimiz yarış ərəfəsində yüksək xidmət ortaya qoyublar. Fürsətdən istifadə edərək, hər bir könüllümüzə şirkətimiz adından dərin minnətdarlığımı bildirirəm. İnanıram ki, burada qazanılan zəngin təcrübə könüllülərimizə gələcək peşəkar fəaliyyətlərində böyük uğurlara yol açacaq”.

Monakoya səfər edəcək könüllülərin səyahət, qonaqlama və yarışda iştirakla əlaqədar bütün xərcləri əməliyyat şirkəti tərəfindən qarşılanacaq.

Qeyd edək ki, müsabiqədə ilk 10-luqda yer alan digər könüllülər - Aytac Qasımova, Xumar Cəmilli, Nuriyyə Nurəhmədova, Svetlana Məmmədova və Elnur Əbilhəsənov da qiymətli hədiyyələrlə mükafatlandırılıblar.