ESTAFET/ Azərbaycan millisinin və “Neftçi”nin futbolçusu Emin Mahmudov Rusiya mətbuatına müsahibə verib. Yarımmüdafiəçi kapitanı olduğu paytaxt klubunun Avropa Liqasındakı ilk oyunu və Rusiya təmsilçisi “Arsenal”la duelindən danışıb.

- “Neftçi” Tula klubuna düşməzdən “Speranta”ya “divan tutdu”. Siz bu qədər güclü idiniz?

- Ümumi hesabın 9:0 olması qanunauyğundu. İlk oyunda əsasən standartlardan qol vururduqsa, evdə rəqibi hər şeydə üstələyirdik. Yaratdığımız imkanların bir hissəsindən istifadə etdik və layiqli şəkildə mərhələ adladıq.

- Rusiya klubuna düşməyinizə sevinirsiniz?

- Əlbəttə, xoşdu. Mən Rusiyada yaşayıram. Valideynlərimin evi Moskva ətrafındadı. Hər imkanda onların yanına gedirəm. Yaxşı ki, məhz Tula “Arsenal”ına düşdük. Mən Premyer Liqada oynayanda belə komanda yox idi. Amma əksər futbolçularla artıq tanışam. Kombarov və Qorbatenko ilə “Spartak”da, Lutsenko ilə Saranskda bir yerdə oynamışıq. Stadionda görüşüb, danışacağıq. “Arsenal”ın “Otkrıtıye"dəki oyununu görmüşəm. Bilirəm ki, ikinci dövrədə çox güclü çıxış etdilər. Amma bizim də yaxşı komandamız var. Çalışacağıq ki, mübarizə aparaq və mərhələ adlayaq.

- “Neftçi” haqda danışardınız ki, bu necə komandadı?

- Azərbaycan tarixinin ən titullu klubudu. Son 6 ildə “Qarabağ” dominantlıq edir. Amma ötən mövsüm biz də çempionluğa yaxın idik. Yeri gəlmişkən, burda “Neftçi” Rusiyada “Spartak” olduğu kimi “xalq komandası” sayılır. Belə alınır ki, mən xalq komandalarını gəzirəm.

- Amma daha çox “Zenit”ə oxşayır. Emblemində neft buruğu, adı isə aydın məsələdi...

- “Neftçi” əvvəl “Neftyanik” adlanıb. Ona görə adı da tarixidi. Axı Bakı həmişə neft şəhəri olub. Əsas sponsorumuz da neft çıxarma ilə məşğul olan SOCAR dövlət şirkətidi. Amma inanın ki, bu, “Zenit”də olan “Qazprom” kimi deyil.

- “Arsenal” ötən mövsüm 6-cı olub. “Neftçi” Rusiya Premyer Liqasında neçənci yeri tuta bilər?

- “Neftçi” və “Qarabağ”ın səviyyəsi Premyer Liqanın ikinci “səkkizliy”idi. Bəxtləri çox gətirsə, ilk “səkkizliy”in sonlarında qərarlaşarlar. Amma bizdə də yaxşı futbolçular var. Məsələn, qapıçı Səlahət Ağayev ötən mövsümü möhtəşəm keçirdi. İndi o, ölkənin ən yaxşı qolkiperidi. Hücumda yaxşı legionerlərimiz var. Yeni oyunçumuz Stiven Jozef-Monroz və indi zədəli olan ən yaxşı bombardirimiz Baqali Dabo. Hər ikisi Fransadandı.

- Baş məşqçi də italiyalıdı...

- Roberto Bordin. Oyunçu kimi “Napoli”də 100-dən çox matç keçirib. Bizə qədər “Şerif”i çalışdırıb və iki il öncə bu komanda Avropa Liqasının qrupunda Rusiyada “Lokomotiv”ə qarşı oynayıb. Ümumiyyətlə, italiyalılar müdafiə olunmağı sevirlər. Amma Bordin bizə hücum futbolu aşılayır. Əlbəttə ki, taktikanı da sevir. Yəqin ki, o, mənim hücum planında ən yaxşı məşqçimdi.

- “Neftçi”də artıq 12 qol vurmuşunuz. Bunadək karyeranızda 3 qol var idi. Bunun səbəbi nədi?

- Rusiyada dayaq yarımmüdafiəçisi kimi oynayırdım. “Spartak”da ümumiyyətlə mərkəz xəttini nadir hallarda keçirdim. Mənə çətin idi. “Neftçi”də də yeni məşqçi gələnədək dayaq yarımmüdafiəsinin dərin zonasında başladım. Bordin sxemi dəyişdi və məni hücuma yaxın çəkdi. Özümün də qol vurmaqdan xoşum gəlir.

- Bordin sizi kapitan da təyin edib. Hərçənd bir ildi komandadasınız...

- Bizdə kifayət qədər oyunçu dəyişikliyi oldu. Mənə hörmət bəsləyirdilər, hamı ilə münasibətim yaranmışdı. Buna görə də məşqçi məni kapitan təyin etdi.

- “Neftçi”nin oyunlarına nə qədər azarkeş gəlir?

- Təəssüf ki, Rusiyadakı kimi deyil. Stadionumuz 15 min tutuma malikdi. Azərbaycan çempionatının oyunlarına 3-4 min gəlir. Əminəm ki, “Arsenal”la Avropa Liqası matçında qat-qat çox olacaq.

Mənbə: Matc.az