ESTAFET/ Xəbər verdiyimiz kimi, Macarıstanda yeniyetmələrin Avropa Olimpiya festivalı davam edir. Festivalda Azərbaycan cüdoçuları da mübarizə aparırlar.

Bu gün tatamiyə çıxan 3 cüdoçumuzdan heç biri fəxri kürsüyə çıxmağı bacarmayıb. Oğlanların mübarizəsində 81 kq çəki dərəcəsində güləşən Niyal Əzimov ilk görüşündən yunan Antonios Popova məğlub olaraq mübarizəni dayandırıb. Qızların mübarizəsində Günel Bəkirzadə (57 kq) ilk görüşdə Albaniya təmsilçisi Amanda Likanı məğlub etməyə çətinlik çəkməyib. Lakin növbəti görüşdə macar Aleksandra Marotiyə məğlubiyyət Güneli mübarizədən saxyayıb. 63 kq çəki dərəcəsində güləşən digər qız cüdoçumuz Fidan Hüseynova ilk qarşılaşmasında xorvat Lusia Qlumaçla bacarmayıb.

Sabah cüdo yarışlarında son gündür. Sonuncu gün tatamiyə daha 2 cüdoçumuz - Adil Kərimli (90 kq) və Məhəmməd Abdullayev (+90) çıxacaq.