ESTAFET/ Voleybol üzrə qadınlardan ibarət Azərbaycan milli komandasının oyunçusu Yelizaveta Səmədova Azərbaycan Voleybol Federasiyasının feysbuk səhifəsində izləyicilərin suallarını cavablandırıb. "Mini-müsahibə"ni təqdim edirik.

Azərbaycanda yaşamaq nə qədər rahatdır?
Azərbaycana 17 yaşımda gəlmişəm. Amma tək yox, Ukraynadan gələn bir neçə nəfər idik. Ona görə də həmin qızlarla tək məşqlərdə yox, zaldan kənarda da bir yerdəydik. Bu üzdən də yeni mühitə uyğunlaşmağa heç bir problem olmadı.

Millidə oynamaq təklifini hansı səbəblərdən qəbul etdin? Əsas səbəblərdən biri pul idimi?
Bakı klubu ilə danışıqlarımız çox çəkdi. Hətta Bakıya baxışa gəlmişdik. Düzünü desəm, rastlaşdığım şərait, zal, burada oynayan voleybolçular məni valeh etdi. Vətəndaşlığa gəlincə, valideynlərimlə çox fikirləşdik və Azərbaycana üstünlük verdik. Gələcək karyeram üçün bu düzgün bir addım idi. O ki qaldı pula, hər bir klubun oyunçuları maaş alır, mənim də öz maaşım var idi.

Avropa çempionatında əsas hədəfiniz nə olacaq?
Hədəflərimiz çox yüksəkdir. Avropa çempionaına ciddi hazırlaşırıq və inanıram ki, yaxşı nəticəyə nail ola bilərik.

Yeni klubunda əsas heyətdə olacağına inanırsan?
Çox şadam ki, belə güclü çempionatda (İtaliya A seriyasında) oynayacam. Çətin olacaq, amma əlimdən gələni edəcəm ki, özümü və ölkəmi layiqincə təmsil edim.

Niyə "Modena"nın təklifini qəbul etmədiz? Məncə, "Modena" daha güclü klubdu. Rəqabətdən çəkindiniz?
"Modena" bu il o qədər də güclü deyil. Bəli, onlardan da təklif var idi. Amma ailəmlə və menecerimlə məsləhətləşib, "Savino del Bene"ni seçdim.

Niyə "8 nömrə"ni seçmisiz?
Adətən, mən "3 nömrə" altında oynayıram. Amma həmin nömrə artıq alınmışdı deyə "8"i seçdim.

Bu vaxta kimi işlәdiyin baş mәşqçilәr arasında ən çox sevdiyin mütəxəssis hansıdır?

İlk məşqçim Andrey Anatolyeviç Onipka.

Karyeranda sonradan təəssüfləndiyin addım atmısan?
Yox və ümid edirəm ki, olmayacaq.