“Formula 1” üzrə 2025-ci il “Qatar Airways Azərbaycan Qran-prisi” öncəsi marşalların peşəkar hazırlığı çərçivəsində növbəti ixtisaslaşdırılmış təlim keçirilib.

innews.media xəbər verir ki, Avropa Oyunları Parkında təşkil olunan təlim Bakı Şəhər Halqası Əməliyyat Şirkətinin təşkilatçılığı ilə baş tutub. Təlimlər nəzəri və praktiki mərhələlərdən ibarət olub.

Təhlükəsizlik prioritetdir

Təlimin nəzəri hissəsində marşallar beynəlxalq yarışlarda qarşılaşa biləcəkləri müxtəlif ssenarilər üzrə məlumatlandırılıb, FIA-nın standartlarına uyğun davranış və prosedurlar barədə təlimatlandırılıblar. Təhlükəli vəziyyətlərə düzgün reaksiya, fövqəladə hallarda pilotun qorunması və yarışın tezliklə bərpası kimi mövzular xüsusi vurğulanıb.

Simulyasiya əsaslı praktiki məşğələlər

Təlimin praktiki hissəsi simulyasiya şəraitində həyata keçirilib. Marşallar real ssenarilər üzərində qurulmuş vəziyyətlərdə:

- yarış zamanı qəza hadisələrinə ilkin müdaxilə,

- pilotun təhlükəsiz şəkildə avtomobildən təxliyəsi,

- yanğın riskinə qarşı çevik reaksiya,

- fərdi qoruyucu vasitələrdən düzgün istifadə və

- komanda ilə koordinasiyalı fəaliyyət üzrə bacarıqlarını sınaqdan keçiriblər.

Bu məşğələlər yarışın təhlükəsiz, fasiləsiz və peşəkar səviyyədə təşkili üçün həyati əhəmiyyət daşıyır.

Marşallar – görünməyən qəhrəmanlar

Təşkilatçılar bildirirlər ki, Formula 1 kimi yüksək sürətli və texniki baxımdan mürəkkəb yarışlarda marşalların fəaliyyəti pilotların və azarkeşlərin təhlükəsizliyinin təmin olunmasında əvəzsiz rol oynayır. Onların təcrübəsi və operativ qərarvermə bacarığı bəzən həyat qurtaran faktor ola bilər.

Qeyd edək ki, “Formula 1 Qatar Airways Azərbaycan Qran-prisi” 2025-ci il sentyabrın 19–21-də Bakıda keçiriləcək.