ESTAFET/ Azərbaycan millisinin sabiq baş məşqçisi Qurban Qurbanov AFFA-nın İcraiyyə Komitəsinin bugünkü iclasından sonra jurnalistlərin suallarını cavablandırıb. Matç.az saytı xəbər verir ki, 46 yaşlı mütəxəssis postundan istefasına da aydınlıq gətirib.

- İclasda hansı qərarlar verildi?

- Açığı, iclasda az iştirak etdim. Çünki mənim məsələm müzakirə olunurdu, kənarda olmalı idim. Bu gün milli ilə yollarımızı ayırdıq. Rəhbərlik tərəfindən bildirildi ki, iki yerdə işləmək milli komandaya fayda vermir. Bu üzdən də ayrılığa qərar verildi. İcraiyyə Komitəsinin üzvlərinə, rəhbərliyə təşəkkür etdim. Bir il burda olduq, işimizi vicdanla yerinə yetirməyə çalışdıq. Əlbəttə, uzun proqram idi. Lakin uzun müddətli müqavilə imzalasaq da, ayrılığa da hazır olmalıyıq.

- Aşağı yaş qrupları üzrə milli komandalarda vəziyyət necə olacaq?

- Artıq dünəndən bu qərarı qəbul etmişdik, bütün baş məşqçilər istefa verəcək.

- Necə düşünürsünüz, postunuzda qalsaydınız, yığmanı yeni mərhələyə daşıya biləcəkdiniz?

- Fikir söyləmək düzgün olmaz. Hər şeyin kökünü möhkəm etməlisən ki, nəticə olsun. Hər hansı fikir söyləmək düzgün olmaz.

- Bundan əvvəl hər şeyə yenidən başlamağın lazım olduğunu demişdiniz. Düşünmürsünüz ki, bu fikirləriniz sizə qarşı münasibəti dəyişib?

- Yox, inanmıram. Bu gün də deyirəm ki, hər şeyə əvvəldən başlamalıyıq. Bizim futbolumuzun çatışmayan cəhətləri çoxdur. Bu, faktdır.

- 6 illik müqaviləniz var idi və yəqin ki, hansısa planınız var idi. Onu həyata keçirməyə nəyə görə imkan vermədilər?

- Məncə, İcraiyyə Komitəsinin üzvləri daha ətraflı məlumat verəcəklər. Biz 6 illik plan hazırlamamışdıq. Amma hissə-hissə çalışmalıyıq. Belə oldu.

- Üzərinizdən böyük yük qalxdığınızı düşünmürsünüz?

- Bilmirəm. Ola bilər. Mən milli və "Qarabağ"ı bir-birindən ayırmamışdım. Hər biri böyük bir məsuliyyət tələb edir. Vicdanla çalışmalıyıq və bunu etdim. Rahatam və belə işlərdə diqqətli olmalıyıq.

- Ən tanınmış yerli baş məşqçi sizsiniz və ayrılıq qərarı verdiniz. Yaxın bir neçə ildə millinin baş məşqçi postu yerli mütəxəssisə tapşırılmayacaq?

- Məncə, bu sualı mənə vermək olmaz. Düşünürəm ki, gənc məşqçilərimiz yetişir. Hər şeyi AFFA-nın öhdəsinə buraxmaq lazllmdır. Yekun qərar onlar verəcəklər.

- Özünüzə haqsızlıq edildiyini düşünmürsünüz?

- Yox, bu barədə düşünmürəm.

- Qurban Qurbanov göndərildi, yoxsa özü getdi?

- Qarşılıqlı razılıq oldu. İcraiyyə Komitəsinin üzvləri belə qərar qəbul etdi. Gördük ki, iki yerdə işləmək çətindir və belə qərar qəbul olundu.

- Bir il postda olduğunuz müddətdə nəyi düz, nəyi səhv etdiniz? İşinizi davam etdirsəydiniz, nəyi aradan qaldırardınız?

- Gəlin, gələcək haqda düşünməyəm. İşlədyimiz müddətdə hər şeyi düz etməyə çalışdıq. Nəticə olması üçün belə etməli idik. Bəlkə də səhv etmişik. İnanın ki, hər şeyi düz etməyə çalışdıq.

- Geri dönüşünüz mümkündür?

- Bilmirəm. Hələ ki, gedirik.

- Millinin baş məşqçisi postunda ən az vaxt sizə verildi. Bu barədə nə düşünürsünüz?

- Normal baxıram. Hər hansı əlavə fikir söyləmək istəmirəm. Hamıya uğurlar arzuladım. Futbolda belə nəticələr olur, 1 aydan sonra da göndərilə bilərdim. Ona görə hansısa fikir bildirmək istəmirəm.

- Necə düşünürsünüz, bundan sonra inkişaf olacaq?

- İnkişaf istəyiriksə, dəyişikliklər olmalıdı. Olacaq-olmayacaq, bunu deyə bilmərəm. Mütləq dəyişikliklər olmalıdır.

- İcraiyyə Komitəsində işinizi davam etdirəcəksiniz?

- Qalmağımı istəyirdilər. Getməyimlə bağlı müraciət etdim. Fevral-mart aylarında bu məsələyə bir daha baxılacaq. Mənim fikrim vəzifəmdən ayrılmaq, diqqətimi klubuma yönəltməkdir. 

Mənbə: Matç