ESTAFET/ Qadın voleybolçular arasında keçirilən Avropa çempionatı davam edir. Azərbaycan millisinin yer aldığı C qrupunun oyunları Macarıstanın paytaxtı Budapeşt şəhərində keçirilir. 

Komandamız bu gün dördüncü matçını Estoniya yığmasına qarşı keçirib. Matç voleybolçularımızın üstünlüyü ilə başlayıb. Gərgin keçən görüşdən millimiz 3-2 (25-20. 18-25. 25-22. 22-25. 15-11) hesabı ilə qalib ayrılıb. Görüşün nəticəsinə görə milli komandamız hesabına 2 xal yazdırıb. Estoniya millisi isə 1 xal qazanıb buna baxmaraq onlar Avropa çempionatı ilə vidalaşıblar.

Bu matçdan sonra voleybolçularımız 7 xalla ikinci pilləyə yüksəlib. Qrupda liderliyi isə Hollandiya komandası təmin edib. C qrupunda oyunlarını başa vuran Estoniya yığmasının sonuncu olması da rəsmiləşib. Digər yerlərin sahibləri bu gün və sabah keçiriləcək görüşlərdən sonra dəqiqləşəcək.
Millimiz son oyununda sabah 17:30-da Rumıniya ilə üz-üzə gələcək.

Qrupda ilk 4 pillənin sahibi olacaq komandalar 1/8 finala vəsiqə qazanacaqlar.