ESTAFET/ Voleybol üzrə qadınlar arasında keçirilən Avropa çempionatında qrup mərhələsinin oyunları sona çatıb. 24 komandanın iştirak etdiyi çempionatda 16 komanda mübarizəni 1/8 final mərhələsində davam edəcək. VIII dəfə Avropa çempionatında iştirak edən voleybol üzrə qadınlardan ibarət millimiz 1/8 finala vəsiqə qazanıb. Millimiz Bolqarıstan komandası ilə qarşılaşacaq və qalib gəldiyi halda 1/4 final mərhələsində Serbiya – Rumıniya cütünün qalibi ilə görüşəcək. 1/8 final mərhələsinin bütün oyunları sentyabr ayının 1-də keçiriləcək.

Qeyd edək ki, millimiz Avropa çempionatında C qrupunda mübarizə aparıb və oyunlarını Macarıstanın Budapeşt şəhərində keçirib. 1/8 final mərhələsində də qızlarımız Bolqarıstan komandası ilə matçını eyni şəhərdə oynayacaq. Millimiz 1/4 final mərhələsinə vəsiqə qazanacağı təqdirdə Türkiyənin Ankara şəhərinə gedəcək.