ESTAFET/ İtaliyanın “Roma” klubu heyətini yeni futbolçuyla gücləndirib. A Seriyası təmsilçisi “Napoli”dən Amadu Diavaranı transfer edib. Bu barədə klubun rəsmi saytı məlumat yayıb.

21 yaşlı yarımmüdafiəçi ilə müddəti 2024-cü ilin iyunun 30-na qədər olan müqavilə imzalanıb. Qvineya millisinin də şərəfini qoruyan futbolçu üçün “Roma” 21 milyon avro təzminat ödəyib.

Bir müddət əvvəl “Roma”nın müdafiəçisi Kostas Manolas 36 milyon avro qarşılığında “Napoli”yə keçmişdi.

“Canavarlar” daha öncə “Yuventus”la da oxşar oyunçu dəyişikliyi etmişdi. Gənc sol müdafiəçisi Luka Pelleqrinini Turin klubuna 15 milyon avroya satan paytaxt təmsilçisi, qarşı tərəfdən 25 milyon avroya 26 yaşlı sol cinah müdafiəçisi Leonardo Spinatsolanı almışdı.